Hainbat lekukok Hiruka hedabieari azaldu diotenez, asteazken goizean goizetik Ertzaintzak Getxoko Lope de Vega kalea moztu eta hor kokaturik dagoen Itzulbaltzetako adinekoen etxeko eraikina hesitu du. Sarean zabaldutako irudiek ere hala erakusten dute:

Getxoko udal gobernuak (EAJ eta PSE-EE) eraikina husteko agindua emanda zuen, baina bizilagunek behin baino gehiagotan adierazi dute ez dutela halakorik onartuko. Uztailaren 26an –eraikina husteko azken epemuga–, dozenaka lagun bildu ziren kalean hustutzea saihesteko.

Ibar Nagusien Etxea elkarteak helegiteak jarriak dizkio epaitegietan Udalaren erabakiari eta asteazken arratsaldean jakinarazi duenez, Bilboko auzitegi batek eraisketa eteteko agindu du. Bizilagunek elkarretaratzea egin dute berriz ere, egoera salatzeko, hirigintza jasangarri baten aldeko Erromo Plataformak deituta.

Getxoko Udalak eraikina eraitsi nahi du bertan beste proiektu bat duelako aurreikusia, adinekoentzako eta gazteentzako etxebizitzak egiteko, baina auzoko bizilagunen artean kontrako iritzia zabaltzen ari da. Nagusien etxean hamaika ekintza eta jardunaldi egiten dira. Uztailaren 28an Udalaren osoko bilkuran protesta egin zuten:

Erreakzioak berehalakoak izaten ari dira. Getxoko Elkarrekin-Podemosek, esaterako, txio bidez salatu du eraikina eraistea: "Gobernu taldeak ez du berriz pentsatu eta azkenean bizkarra eman die adineko pertsonei". Getxoko EH Bilduk ere gogor salatu du sareetan gertaturikoa: "Auzoa polizialki okupatu dute mehatxuka. Hau da euren eskaintza herriko nagusientzat. Lotsagarria benetan".