Nerbioi-Ibaizabal ibaia azpitik zeharkatuko duen errepidearen proiektuak Getxo eta Portugalete lotuko lituzke. Azpiegitura horren eraikuntzak ingurumen eta osasunarentzat mehatxu handiak sortuko ditu, Subflubiala Ez! plataformaren esanetan. Horien artean leherketak nabarmendu dituzte: hasiera batean Artatzan (Leioa) soilik egiteko asmoa zegoen, baina egun "azterketa zorrotzik egin gabe" beste tarte batzuetan ere egitea dago aurreikusita. Leherketek zarata eta bibrazio arriskutsuak sortuko dituztela dio plataformak, eta hori dela eta inguruko eraikinak kaltetuak izango direla, Artaza-Romo ikastetxea kasu. Horri gehitu behar zaio PM 2.5 partikulek sortzen duten kutsadura.

Ballontiko biaduktua ibai azpiko azpiegiturarekin lotura izango duen beste proiektua da. Jatorriz, ingurumen inpaktuaren ebaluazioan baztertu zuten, eta ondoren "arrazoirik gabe berpiztu dute". Proiektu horrek Galindoko (Sestao) azken berdeguneak irentsiko lituzke, eta gainera aldaketa horren berri ez zaie eman kaltetu guztiei,Subflubiala Ez! platafomak salatu duenez legez knapokoa dena.

Erantzuna

Horren guztiaren aurrean ekainaren 14 eta 15ean proiektuaren aurkako kanpaldia antolatu du plataformak Artatza parkean, obrak hasiko lirateken lekuan. Bi egun horietan hainbat jarduera burutuko dituzte: eguzki tresnen tailerrak, zuzeneko musika bertako artistekin, poesia ekologikoa, haurrentzako jolasak edo Frantziako Estatuko A69 autobidearen aurkako borrokari buruzko hitzaldia. 15ean kalejira batekin amaiera emango diote ekimenari.