"Errekaleor Gasteizko auzo historikoa da, gasteiztar askoren oroimen bizia, hiriaren ondarea. Horregatik, adierazpen hau sinatzen dugunok Errekaleorreko auzia hitzen bidez konpondu dadin eskatzen dugu. Dei egiten diegu Gasteizko udal gobernuari –eraikinak Gasteizko Udalak erosi baitzuen– eta bertan bizi direnei elkarrizketari bidea emateko. Gure hirian, maiz, jakin izan dugu ezberdinen artean elkarrizketa, tolerantzia eta elkarbizitza sortzen. Hiri eredu hori aldarrikatu nahi dugu berriz ere."
Adierazpen honekin elkarrizketarako deia egin dute Gasteizko hainbat lagun ezagunek. Roberto Ercilla arkitektoak, Lourdes Oñederra EHUko irakasle eta idazleak, Elisa Rueda irakaslea eta poetak, Javier Armentia Iruñeko Platenarioko zuzendariak, Blanca Urgell EHUko irakasleak, Daniel Castillejo Artiumeko zuzendariak, Eva Silvan Save the Childreneko kideak, Miguel Angel Ruiz eta Rosabel Argote CEAReko kideek, Javier Argote Arabako Kontsejuetako presidente ohiak eta Txaro Arrazola artistak bat egiten dute idazkiarekin.
Hain zuzen, bihar Gasteizko udaletxean izango den eztabaidaren aurretik plazaratu dute idazkia, PPk auzoa botatzeko mozioa aurkeztu baitu, eta oposizioan dauden taldeek –EH Bildu, Podemos eta Irabazik– osoko zuzenketa bat.
