Enpresen negozioa kartzelan: 100 milioiko irabaziak presoen lan prekarioari esker
Espainiako Espetxe Lanak erakundearen eta patronalaren hitzarmenaren arabera 133 enpresek presoen lan indarra erabiltzen dute beraien ekoizpenerako. 156 milioi euroko fakturazioa izan duten arren, soldatetako gastua 54,5 milioi eurokoa izan da soilik.
Cuartopoder atariak argitaratu duen erreportajearen arabera, 3.500 presok egiten dute lan Espainiako Estatuko 53 tailerretan, 235 eta 565,5 euroko soldaten truke. Langileen Estatututik eta hitzarmen kolektiboetatik at egonik, langile presoek ez dituzte oinarrizko eskubide konstituzional eta laboralak; afiliazio sindikala edo urteroko oporrak, adibidez.
Noski, enpresek egoera aprobetxatu eta gutxieneko soldatatik behera ordaintzen diete langileei, mozkinak handituz. Suárez Tascón, Espetxe Lanetako gerenteak langileen kudeaketa eraginkorra azpimarratu du, irabazi handiak azaltzeko orduan.
CCOO sindikatuaren ustez ez dago zalantzarik enpresa pribatuak erakunde publikoen instalazioez baliatzen ari direla eta “ia esklaboa” den lan indarra lortzeko.
Hauek dira Euskal Herriko kartzeletan presoen lana erabiltzen duten enpresak:
- Basaurikoan: Cartonajesinternacional SL, Flexix S.A, Vivasa
- Langraitz Okakoan: Ind. Tec… Delaespuma SL, Ofitainteriores, S.A., Punpa Sari, Sociedad Cooperativa Limitada Alecop
- Iruñekoan: Graficas Zokoa S.L.
- Martutenekoan: Talleres Escoriaza S.A.
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
