ARGIA.eus

2021eko azaroaren 30a

Emakume, neskatila eta LGBTIQA+ kolektiboko pertsonei berezkoak zaizkien asilo-arrazoiak aitortzeko, Feminist Asylum kanpaina abiatu dute

  • Feminist Asylum kanpaina abiatu dute Europa mailako hainbat mugimendu, talde, elkarte, alderdi eta sindikatuk. Euskal Herriko Emakumeon Mundu Martxak bat egin du kanpainarekin, eta herritarrei dei egin die berau babestera.

ARGIA @argia
2021eko azaroaren 10a
Euskal Herriko Emakumeon Mundu Martxak mugen aurka egindako ekintza (Argazkia: Ecuador Etxea)

Euskal Herriko Emakumeon Mundu Martxak, Europako Martxaren bidez, bat egin du Feminist Asylum koalizioak abiatutako kanpainarekin. Emakume, neskatila eta LGBTIQA+ pertsonek asiloa eskatzeko izan ditzaketen arrazoi espezifikoen errekonozimendu eraginkorra aldarrikatzea du helburu kanpainak.

Izan ere, azaldu dutenez, emakumeek, neskatilek eta LGBTIQA+ kolektiboko pertsonek beren jatorria atzean uzteko eta atzerrian asiloa eskatzeko arrazoi espezifikoak izaten dituzte, sarri indarkeria matxistarekin lotura daukatenak (etxeko barruko indarkeria matxista, sexu-esplotazioa, ezkontza behartua, genitalen mutilazioa, pertsonen salerosketa, lege diskriminatzaileak, eta abar). Eta erbesterako bidea hartzean ere, uneoro egon ohi dira indarkeria matxista eta esplotazioa jasateko arriskuan: “Sexu-indarkeria trafikatzaileen aldetik edo errefuxiatu-eremuetan, sexu- edo lan-esplotazioa eta pertsonen salerosketa igarotzen dituzten herrialdeetan —baita Europakoetan ere—, mehatxuak, traumatismoak eta arrisku handiak seme-alabentzat”.

Errealitate horren aurrean, Europako Kontseiluko 2008ko gizakien salerosketaren aurkako borrokari buruzko hitzarmenean zein 2011ko Istanbulgo Hitzarmenean jasotzen denez, Europak asilo-prozedurak duintasunez eta eraginkortasunez bermatzeko derrigortasuna duela gogorarazi dute Emakumeen Mundu Martxatik. Praktikan, ordea, hartutako konpromisoak Europako “herrialde oso gutxik” betetzen dituztela salatu dute: “Ez dituzte kontuan izaten genero-indarkeriarekin lotutako asilo-eskaeren arrazoiak, kasu partikular bakoitzari erreparatu eta aztertzeko baldintzak ez direlako egokiak indarkeria-modu espezifikoak antzemateko, edo, estatuetako agintarien ordezkariek muzin egiten diotelako harrera-betebeharrari”.

Gauzak horrela, Europan bizi diren militante diren heinetik, gauzak alda daitezen exijitzeko beharra ikusi eta bat egin dute Feminist Asylum koalizioaren kanpainarekin. Emakumeen, neskatilen eta LGBTIQA+ kolektiboaren eskubideen aldeko hainbat mugimendu, talde, elkarte, alderdi eta sindikatuk osatutako koalizioak eskaera bat egin du, eta asmoa eskaera hori Europako Batzordeari, Europako Parlamentuari, Kontseilu Europarrari eta Schengen eremuko estatuetako gobernuei helaraztea da. Dokumentua hainbat hizkuntzatan dago irakurgai [euskarazkoa irakurtzeko klikatu lotura honetan], eta neurri zehatzak eskatzen ditu Europan eta Schengen eremuan sinatuta dauden nazioarteko hitzarmen guztiak alferrikakoak izan ez daitezen.

Eskaerak ondoko hiru puntuak jasotzen ditu:

-Europako Batzordeak eta estatuetako gobernuek beharrezko baliabideak jartzea, emakume, neskatila eta LGBTIQA+ pertsonen asilo-arrazoi espezifikoak benetan onartzeko prozedura eta egitura egokiak ezar daitezen.

-Istanbuleko Hitzarmena eta Europako Kontseiluaren gizakien salerosketaren aurkako borrokari buruzko Hitzarmena eraginkortasunez indarrean jartzea, eta horiek betetzen direla bermatuko duen Europako zaintza-egitura bat sortzea, genero-arrazoiek eragindako indarkeriaren biktimek onarpena, laguntza eta nazioarteko babesa jaso ditzaten.

-Lege-bideek aukera eman diezaietela emakume, neskatila eta LGBTIQA+ pertsonei Europan asiloa eskatzeko.

Kanpainak sei hilabeteko iraupena izango du, eta epe-tarte horretan kolektibo zein norbanakoek bat egin ahalko dute eskaerarekin. Euskal Herriko Emakumeon Mundu Martxak herritarrei dei egin die eskakizuna sinatzera, www.feministasylum.org web-orriaren bidez.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Migrazioa kanaletik interesatuko zaizu...
2021-11-30 | ARGIA
Jatorri latinoamerikarreko biztanleak EAEn, kolektibo gazte eta feminizatua

Latinoamerikar jatorriko EAEko herritarrak aztertu ditu Ikuspegi Immigrazioaren Euskal Behatokiak, bere azken argitalpenean. EAEko etorkinen artean, kolektibo ugariena da latinoamerikarrena, gehienbat emakume gazteak dira eta okupazio-tasa handia dute.


2021-11-25 | ARGIA
27 migratzaile hil dira Mantxako Kanalean itota, itsasoa gurutzatzeko saiakeran

Frantziako agintariek jakinarazi dutenez, gutxienez 27 lagun hil dira Mantxako Kanalean asteazkenean, horietako gehienak errefuxiatu kurduak, itsasoa ontzi puzgarri batean igaro nahian zebiltzala hondoratu egin denean.


Etorkinen segurtasuna bermatzeko "berehalako neurriak" eskatu dituzte Irun eta Hendaiatik

Ehunka herritar batu dira Irungo Harrera Sarea, Diakite, Etorkinekin eta Elkartasuna Larrun taldeek finkaturiko elkarretaratzean. Boli Kostatik zetorren etorkinaren gorpua atzeman zuten larunbatean Bidasoan, muga zeharkatzean aurten hil den zazpigarren migratzailea da... [+]


2021-11-22 | Leire Artola Arin
Bidasoan hildako migratzailearena “iragarritako heriotza” izan dela salatu du Irungo Harrera Sareak

Boli Kostatik zetorren 38 urteko gizonezkoaren gorpua ibaian aurkitu zuten. Igandean elkarretaratzea egin du Irungo Harrera Sareak, eta instituzioei “gehiago” egiteko eskatu diete.


2021-11-17 | ARGIA
Hamar pertsona hil dira Mediterraneo itsasoan, Europara iristeko saiakeran

Hamar heriotza horiekin, aurten Mediterraneoa gurutzatu asmoz hildako pertsonak 1.225 direla jakinarazi du Mugarik Gabeko Medikuak GKEak. Mantxako Kanalean ia hirurehun pertsona erreskatatu dituzte asteartean.


Irakurrienak
Azken albisteak
Argia buletina
Egunaren laburpena
zure e-postan
Eguneraketa berriak daude