Eusko Jaurlaritzak “bere baliabideekin” egin du Gobernu Kontseiluak atzo onartutako txostena. Espainiako Estatuari egotzi dio nazioarteko harremanen, defentsaren eta indar armatuen gaineko eskumena “gehiegikeriaz eta disfuntzionalitatez” erabiltzea. Hala, poliziaren funtzio ia guztiak Ertzaintzari dagozkiola gogorarazi du eta Estatuko Segurtasun Indar eta Gorputzen (FCSE, gaztelaniazko sigletan) presentziak edozein polizia-ratio “desafiatzen” duela.

Bestalde, administrazioaren antolaketan “bikoizketa larriak” atzeman ditu Eusko Jaurlaritzak, traspasatu gabeko eskumenek sortutako “gardentasun faltagatik”. Egoera horren aurrean, Estatuturen garapena behingoz “burutu” dadila eskatu du.

Eusko Legebiltzarrera eramango du Urkulluren exekutiboak dokumentua, alderdien arteko eztabaidarako eta lanerako tresna moduan ikusten baitu. Lehenik Foru Aldundien eta Eudelen ekarpenak jasoko dituzte baina.

Txostena osorik irakur daiteke (pdf) Eusko Jaurlaritzaren Irekia webgunean (gaztelaniaz soilik).