ARGIA.eus

2021eko apirilaren 21a

EAEko erakundeen lankidetzarako eta garapenerako aurrekontuak %0,7ra ez direla iristen salatu dute

  • "2018rako aurrekontuek argi erakusten dute, beste behin, %0,7 historikora iristeko zeinen borondate gutxi duten" erakundeek, EAEko Garapenerako GKEen Koordinakundeak salatu duenez.

ARGIA @argia
2017ko azaroaren 30a
Lankidetza eta garapenerako laguntzen murrizketa salatzeko moblizazio baten artxiboko irudia (argazkia: Euskadiko GGKEen Koordinakundea).

Euskadiko Garapenerako GKEen Koordinakundeak aztertu ditu euskal erakunde publiko nagusiek 2018ko aurrekontuetarako proposamenetan lankidetzarako dituzten partidak eta honakoa adierazi du: "Ia euskal erakunde publiko guztietan erabatekoa da beren hitzak ekintza bihurtzeko borondate politikorik eza".

Diotenez, "salbuespenak salbuespen, aurrekontuetan egiten den ahalegina urria baino urriagoa da. Erakundeek eta alderdiek erantzukizunak eta konpromisoak izan behar dituzte pertsonekin, haien eskubideekin eta haien ongizatearekin, eta horiexek izan behar dute beren lanaren ardatz”.

Eusko Jaurlaritzaren diru-kutxa %3,9 handitu bada ere iaz aurkeztutako aurrekontuarekin alderatuz, GKEen Koordinakundeak salatu du lankidetzarako partida txikitu egin dela, %0,39 baino ez izateraino: duela hamarkada bateko ehunekoa da gutxi gorabehera. “Gobernuak pertsonako inbertitzen dituen 5.470 eurotatik 21 euro baizik ez dira lankidetzarako”, adierazi du elkarteak.

Bizkaia eta Gipuzkoako Foru Aldundien kasuak ere aipatu dituzte, baita Bilboko eta Donostiako udaletakoak ere. Azpimarratu dutenez, lankidetzarako jartzen diren ehunekoak lehengo berean izoztuta daude instituzio horietan eta ez dirudi aurrekontuak handitzeko asmorik dagoenik, nahiz eta aurrekontuen %0,7 garapenerako lankidetzarako jartzeko konpromisoa aspaldi hartu zen Nazio Batuetan.

Arabako Aldundiarena da EAEko kasurik larriena, oso ehuneko baxuan jarraitzen duela nabarmendu baitute. Aztertutako erakundeen artean ehuneko txikiena du.

Kontrara, Gasteizko Udalak jarraitzen du konpromisoa betetzen eta GKEen Koordinakundearen arabera, horrek erakusten du "borondate politikoa izanez gero erronka hori posible eta lorgarria dela".

Erakunde horietatik gehienek gutxi-asko diru gehiago jarriko dute guztira lankidetzarako (Gipuzkoako Foru Aldundiak, adibidez), baina gehikuntza hori ez da ia batere islatu lankidetzarako ehunekoan, erakundearen guztizko aurrekontuak ere handitu egin baitira. “Horregatik, erakunde batek lankidetzarekiko egiaz zenbateko ahalegina egin duen baloratzeko, egokiagoa da ehunekoak aztertzea, eta ez zenbateko absolutuak, argazki egiazkoagoa erakusten digute eta”, azaldu dute.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Gobernuz Kanpoko Erakundeak kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude