108 pertsona: 84 gizon, hamahiru emakume eta hamahiru haur erreskatatu zituen Aita Mari ontziak apirilaren 5eko goizaldean. Noraezean zebiltzan bi ontzitan. Jatorri hauetako migratzaileak dira Europako kostaldera iritsi nahian zebiltzanak: Eritrea, Etiopia, Pakistan, Sudan, Egipto, Togo, Ginea Konakry, Kamerun, Nigeria, Niger eta Ghana.

Gobernuz kanpoko erakundeko kideek Italiako Gobernuaren jarrera salatu dute. Izan ere, Salernoko portuan lehorreratzeko baimena eman diote eta Aita Mari ontziko kideek hurbilagoko porturen batean lehorreratzea eskatu zuten, erreskatatutako pertsona batzuen osasun egoera larria kontuan hartuta. Ontzitik bertatik grabatutako bideoan, eskifaiako kide batek deitoratu zuen gaua ontzigainean igaro behar izana. Haize eta olatu ekaitz baten ondorioz, bustita eta hoztuta gelditu ziren migratzaileak. Salatu dute gobernuak gertuagoko porturen batean lehorreratzeko eskakizunei erantzun ere ez diela egin. Nazioarteko zuzenbidearen araberako giza printzipioak betetzeko eskatu diote Italiako Gobernuari.

Migrazioari eta Asiloari buruzko Europako Itun berria aurki indarrean sartuko da eta litekeena da Aita Mariren erreskate hau araudi berriaren aurreko azken misioa izatea. SMH Itsas Salbamendu Humanitarioa elkarteak salatu du araudi aldaketaren ondorioz erreskate taldeak eta haien lana zigortu eta kriminalizatuko dutela.