Cristina Ruedak abiatu du kanpaina Change.org webgunean, minbizia duten gaixoen izenean: "Duela urtebetera arte, gaixo ugari Onkologikora bideratzen zituen Osakidetzak. Zentroak makina sofistikatuenak ditu, eta geldirik daude uneotan. Osakidetzako itxaron-zerrenda luzeek gaixoak ernegatzen dituzte, baita Onkologikoko langileak ere. Pentsatzen dut tartean interes politiko eta pribatuak daudelako ari dela gertatzen hau".

Sinadura bilketaz gain, langileek ekimen gehiago antolatu dute, euren aldarrikapenak gizarteratzea xede dutenak. Asteartero, adibidez, elkarretaratzeak egiten dituzte Kutxak Donostiako Garibai kalean duen bulegoaren aurrean, arratsaldeko 18:00etan.

Pribatizazioaren mamua

Pasa den martxoaren 7an, Eusko Legebiltzarrak Institutu Onkologikoa Osakidetzan sartzeko eskaera egin zuen, eta Jaurlaritzari dei egin zion Kutxa Fundazioarekin –zentroaren jabearekin– elkarrizketak hasteko. EH Bilduk aurkeztutako testua PSE-ko legebiltzarkideek babestu zuten; UPyD abstenitu egin zen eta EAJ-k eta PP-k aurka bozkatu zuten.

Hiru aste lehenago, EH Bilduko ordezkari Ainhoa Beolak, Iban Asenjok, Joseba Permachek eta Xabi Sotok prentsaurrekoa eman zuten Donostian, Onkologikoaren pribatizazio arriskuaz ohartarazteko. "Pribatizazioranzko bidean, Kutxabank eta EAJ, PPren babesarekin eta PSEren kolaborazio akritikoarekin, kutxen gizarte-ekintza likidatzeko urratsak ematen ari dira", salatu zuen koalizioak. Kutxabankek gizarte-ekintzarako aurrekontua %60 murriztuko zuela jakin ostean eskaini zuen prentsaurrekoa EH Bilduk.

Langileen gehiengoa, Legebiltzarraren ebazpenarekin bat

Onkologikoko 230 langilek komunikatua plazaratu zuten, Legebiltzarrak hartutako erabakiarekin adostasuna agertzeko: "Osasuna guztion ondarea da, eta oinarrizko eskubidea; minbizia duten gaixo guztiak tratatu behar dira, inolako murrizketa eta eragozpenik gabe".

Onkologikoak 300 langile ditu, eta horietatik 60 dira medikuak. Hain justu, medikuek gutuna bidali zieten otsailean Jaurlaritzako Osasun Sailari eta Kutxaren Gizarte-Ekintzaren arduradunei, El País egunkariak jakinarazi zuenez. Zentroaren "izaera publikoa" aldarrikatu eta Osakidetzan sartzeko eskatu dute profesionalek.

Onkologikoa gatibu duten lau gatazkak

Mikel Ormazabal kazetaria Onkologikoa zigortzen ari diren lau gatazkaren inguruan mintzo zen otsailaren 24an El País-en plazaratutako artikuluan: EH Bilduren eta EAJren arteko ika-mikak, kutxen Gizarte-Ekintzarako aurrekontuen murrizketa, osasun sistemaren eredua eta instituzioen murrizketak. Horiek dira "ospitalearen etorkizuna korapilatzen duten arrazoiak", Ormazabalek dioenez.

Onkologikoak zentro pribatu bezala jarraitu beharko ote lukeen mahai-gaineratu da, bokazio publikoa duen arren. Medikuek eskatu dute Osasun Sailak zuzendu eta kudeatu dezala; eta EH Bilduk ere zentroak kontzertatua izateari utzi eta Osakidetzan sartzeko eskatu du, balizko pribatizazioari ateak ixteko.

Kutxak eta Osasun Sailak, baina, aldian-aldian berrituko diren kontzertuen bidezko kolaborazioa mantentzearen aldeko apustua egin dute, Ormazabalek nabarmendu duenez. Aurten iraungiko den konbenioa medio, Jaurlaritzak Onkologikoaren aurrekontuaren %85 jartzen du (iaz 30 milioi euro jarri zituen), eta gainerakoa (2013an 3,5 milioi euro) Kutxak, Gizarte Ekintzaren bidez.