CAFeko langileek zuzendaritzari amiantoaren biktimekin duen jokabidea aldatzeko eskatu diote
Elkarretaratzea egin dute ostegunean Beasaingo amiantoaren biktimen monolitoaren aurrean. Ordu berean Vicente L. I.ren heriotzaren inguruko epaiketa egiten ari ziren, Donostian
CAFeko langileek elkarretaratzea egin dute amiantoaren biktimen eskulturaren aurrean, amiantoak hil egiten du lelopean. Aldi berean, Donostian, Vicente L. I.ren sendiaren eta CAFen arteko epaiketa hasi da.
Vicentek CAFen egin zuen lan 1971. urtetik 2014ra arte, bere lan-bizitza osoan. Biriketako minbiziak jota hil zen, eta 2012an CAFek amiantoaren eraginpean egondako langileen zerrendan sartu zuen, baina sendiari ez dizkio kalte ordainak eman nahi. Familiak 318.926,97 euroko ordaina eskatzen du, eta 70.000 euro gehiago alargunarentzat, nozitutako kalte moralengatik.
CAFeko langileek sendiari babesa adierazi diote eta zuzendaritzari biktimekin duen jarrera aldatzeko eskatu, mina areagotu egiten dutelako. Asviamie Euskadiko amiantoaren biktimen elkarteak ere CAFi kargu hartu dio, “gaixo daudenekiko eta hil direnekiko erantzukizuna ez duelako onartzen”. “Iruditzen zaigu badela garaia auzibideak uzteko, kaltetutako familiei kalte moral gehiago egitea besterik ez baitu lortzen”, diote. Beasaingo konpainiak era honetako auzi gehiago ditu zabalik: Celestino Tolosaren aferaren ebazpena errekurritu egin dute duela hilabete baino gutxiago, eta beste epaiketa baten zain daude.
Funts eske
Asviamiek amiantoaren biktimentzako funtsa sortzeko Lege Aurreproiektua onestea “inoiz baino premiazkoagoa” dela aldarrikatu du. Eskaria Diputatuen Kongresuan iaz erregistratu zela gogoratu dute eta helburua, “behingoz”, auzi judizialak amaitzea eta biktima “guztiak” aintzat hartzea dela.
Enpresa batzordeak salatu du otsailaren 26tik martxoaren 3ra bitartean amiantoa agertu zela labe kalibratzailean egindako obretan eta egun horietan lanak ez zirela eten. Enpresak azaldu du ohartu bezain pronto hartu zituela neurriak.
Jose Mari Esparza idazle, editore eta ekintzaile menderaezinak bere lanerako txokoan hartu gaitu, Altaffaylla Kultur Elkartea eta Txalaparta argitaletxearen sorlekuan, liburuz inguraturik. Gaztetan 20 urtez aritu zen Luzuriagaren Tafallako fabrikan lanean eta orain berriki... [+]
Beasaingo tren lantokiko hiru nabe amiantoz kutsatuta zeudela jakin eta berrogei egunetara agerraldia egin dute Eusko Legebiltzarrean langileen eta erakundeen ordezkariek. Enpresa Batzordeko kideek salatu dute zuzendaritzak informazio "erabat eskasa" eman diela. Eusko... [+]
Laugarren dibisioko zortzigarren nabean egin diren desmuntaia lanen ondoren gertatu da amianto kutsatzea eta legez onartuta dagoena baino altuagoa izan da neurketaren emaitza. Langileei hartutako sei laginetatik lauk positibo eman dute.
Europar Batasuneko erakundeek adostuta, amiantoaren inguruko zuzentaraua aldatu eta minbizia sortzen duen mineralarekiko gehienezko esposizio-maila murriztu dute ekainean. Horretarako, funtsezkoa izan da Nantesen Tripode izeneko eraikinean frantziar administrazioko langileek... [+]