Brigadak aurkeztu ditu Askapenak, ilegalizazioaren mamua gainean duela
2016ko brigadetan parte hartzeko epea ireki du Askapena erakunde internazionalistak. Auzitegi Nazionalak aurki emango du Askapena legez kanpo uzteari eta bere bost kideri buruzko epaia, baina erakundeak ez du bere jarduna eten nahi izan.
“Inork ez dezala pentsa geldirik zain geratzen garenik, ezta gure proiektu eta lan internazionalistari muzin egingo diogunik ere”, baieztatu dute.
Testuinguru hori dela eta, talde internazionalistako kideek azaldu dute aurtengo brigadek “balio politiko erantsia” izango dutela. Brigada hauek “Espainiako Erreinuari hainbeste min egiten dioten ikuspegi politiko internazionalista, abertzale eta herritarrean” kokatzen dituzte.
Bere lana “bidezko eta beharrezko” gisa definitu dute, eta jendeari dei egin diote brigadetan parte hartzera, horrela munduko injustiziei “iraultzaile eta euskal internazionalista” bezala erantzuteko.
Izena emateko brigadak@askapena.org helbidera idatzi behar da. Martxoaren 31ra arte egongo da epea.
Abya Yala historia zapalkuntzaz beteriko bizitza dela esan daiteke. Bertako aberastasun naturalek paper garrantzitsua betetzen dute munduko burgesiaren metatze prozesurako.
Europako, Ekialde Hurbileko eta Abya Yalako askapen borroken ezagutza euskal herriratzea izango da brigadisten lana. Askapenak azpimarratu du elkartasun internazionalista herrien arteko "ezinbesteko tresna" dela eta munduko beste herri langileei babesa eta elkartasuna... [+]