Bizkaiko Gazte Euskaltzaleen Topaketak izango dira azaroaren 10ean Portugaleten
Gazte Mugimenduak antolatu ditu. 2016ko abenduko “Gazteraiki” topaketak dituzte abiaburu oraingoek, eta besteak beste Bizkaia osoko gazteak biltzea dute helburu.
Lau helburu ditu buruan Gazte Mugimenduak topaketa hauei begira:
-Euskararen inguruan hausnartzea.
-Aipatu hausnarketa, topaketetatik haratago, Bizkaian zabaltzeko tresna eraginkorretan pentsatzea eta eskaintzea.
-Euskararen borrokari eta euskaratik antolatuko den Gazte Mugimendu bati zilegitasuna ematea eta atxikimendu emozionala lortzea.
-Lehenengoz Bizkaia mailan egun batez gazteei honen inguruan hitz egiteko tartea ematea.
Azaroaren 10erako egun osoko egitaraua prestatu dute, eta tartean mahai-ingurua izango da. Ondokoak izango dira parte-hartzaileak: Joxe Mari Odriozola idazlea, Iñaki Etxarri Bilboko Euskaraldiako koordinatzailea eta Amaiur Renteria antolaketa taldeko kidea.
Topatu.eus-en Gazte Mugimenduak plazaratutako gogoeta osoa irakurri ahal izango duzue, eta hausnarketa bera bideoz emana.
