Urriaren 12an

Bertso ibilaldi historikoa, iragana ezagutu eta orainaren jabe egiteko

ARGIA @argia
2019ko urriaren 09a

Deskoloniza gaitezen leloa ez baita lelo huts bat, urrats txikiez ekingo diogu zeregin horri urriaren 12an eta goizean antolatutako ekitaldietako bat da ibilaldi historikoa. Urko Apaolaza ARGIAko kazetari eta historialariak gidaturik, Alde Zaharrean barrena abiatuko gara hainbat txoko eta pertsonaia ezagutu eta atzean ezkutatzen diren historia ezezagunak ahal den neurrian argitara ekartzen.

Zer ikusi dauka Santa Maria elizak esklabotzarekin? Nola eta zeinek eramaten zuen edateko ura Donostiara? Zein dira gerrek utzitako arrastoak? Eta euskarak, zer presentzia izan du kale horietan? Geldiune bakoitzean azalpen historiko oso laburra emango du Apaolazak.

Hori izango dute testuinguru Beñat Gaztelumendik eta Miren Artetxek bertsotan egiteko. Gai oso zabala izango dute, librean aritzeko nahi duten rol, doinu eta neurrian. Gaztelumendi donostiarrak ezagun dituen hiriko txoko eta pertsonak izango ditu aurrean, "deskolonizazioaren" begiradatik kantatzeko. Eta Artetxe hendaiarrak jolastu ahalko du kanpotarraren begiradarekin. Bi ahots gazte, mugimendu eraldatzaileetan trebatutakoak.

Ibilbidea laburra izango da, ordubete inguruko iraupenarekin; Trinitate plazan hasi eta Plaza Berrian (Konstituzio plaza) amaituko dugu 13:00ak inguruan.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


ARGIAk 100 urte kanaletik interesatuko zaizu...
Azkenak
EGILEA
Eguneraketa berriak daude