Azkenean, bukatu da eztabaida: PMA edo ugalketa lagundua emakume guztiei zabaltzearen alde bozkatu du Frantziako Parlamentuak. Ekainaren 29ko bozketan 326 diputatu agertu dira alde, 115 kontra eta 49 abstenitu dira. Bi urtez iraun du eztabaidak, hitz lesbofobo eta transfobo bortitzak plazaratuz usu. Baina bukatu da eta bikote homosexualek zein bikotean ez diren emakumeek ere jasotzen ahalko dute ugalketa lagundua, Segurtasun Sozialak ordaindurik.

Bozkaturikoari segi, esperma emailearen identitatea edota honi buruzko datuak jasotzen ahalko ditu umeak hemezortzi urtetatik goiti (adina, ezaugarri fisiko batzuk ala beste). Eztabaida handiak sortu dituen aldaketa da azken hau, esperma emailearen anonimotasunaren bukaera dakarrelako legeak.

Ekainaren 24ean berriz ere aurka bozkatu zuten senatariek, baina Frantziako Parlamentuaren antolaketari segi Legebiltzarrak duenez azken hitza, legea pasa da behin betikoz. Bioetika Legearen parte da aldaketa nagusi hau.