Indarkeria matxistaren biktima den emakume barakaldar bat etxegabetzeko asmoa dute hilabete barru. Horren aurrean, Argitan Emakumeentzako Aholkularitza Zentroak eta Berri-Otxoak Gizarte Bzterketaren Aurkako Plataformak elkarretaratzea egin dute asteazkenean Alokabidek Bilbon dituen bulegoen aurrean. Udaleko gizarte-zerbitzuek kalteberatasun-egoeran dagoela ziurtatu dute eta hiru seme-alaba adingabe ditu emakumeak. Etxegabetze agindua maiatzaren 21ean ezarri dute, 9:15ean.

Elkarteek salatu dutenez, egungo legedia urratzen ari da Alokabide. Kalteberatasun-egoeran dauden pertsoei berehala beste bizileku bat ematera behartuta daudela gogorarazi dute. "Betebehar hori ez da inoiz betetzen", azpimarratu dute.

Horregatik, instituzioei araudiak betetzeko eskatu diete, Barakaldoko Udaleko gizarte zerbitzuek eta Eusko Jaurlaritzak ez baitiote oraindik emakumeari alternatibarik eskaini.

Elkarteek azpimarratu dutenez, problematika horri aurre egiteko nahikoa baliabide dago eta arazoari aurre ez egiteko arrazoi bakarra "borondate politiko falta" da.  "Krisi ekonomiko eta sozio-sanitarioko garai honetan berdintasunaren aldeko promesen edo kanpainen aurrean jarduerak lehenesteko eskatzen diegu erakundeei", gaineratu dute.