Autokontsumo energetikoa bultzatzeko legea tramitera onartuko du Eusko Legebiltzarrak, EH Bilduk proposatuta

  • Autokontsumorako eguzki-plakak eta auto elektrikoak kargatzeko instalazioak lizentzia eskatu gabe jartzea ahalbidetuko du legeak. EH Bilduren ustez autokontsumoa "tresna garrantzitsua" da trantsizio energetikorako bidean. 


2022ko urriaren 13an - 08:56
Azken eguneraketa: 10:00

Eusko Legebiltzarrak tramitera onartuko du autokontsumo energetikoa bultzatzen duen lege proposamena ostegun honetan. EH Bilduk proposatu zuen legea ekainean (pdf), eta Eusko Jaurlaritzaren aldeko iritzia ere badu. Hortaz, autokontsumorako eguzki-plakak eta auto elektrikoak kargatzeko instalazioak lizentzia eskatu gabe jarri ahal izango dira lege horrekin Araba, Bizkaian eta Gipuzkoan.

Tramitazioa arinduta, energia berriztagarrien autokontsumoa handitzea nahi dute legearen sustatzaileek. Gainera, azaldu dutenez, Europar Batasunak arlo horretan jarritako irizpideekin bat dator ekimena, eta beste hainbat tokitan jadanik legea aldatu dute norabide berean, Nafarroan kasu.

Badira urte batzuk EB autokontsumoa bultzatu beharraz ohartarazten ari dela, Espainiako Gobernuak ere lege-dekretua onartu zuen helburu berarekin, baina EAEn orain arte ez da ezer egin oztopo horiek ezabatzeko.

Eusko Legebiltzarrean tramitera onartuko den legearen bidez, autokontsumorako instalazioak ezarri nahi dituztenek ez dute obra-lizentziarik eskatu beharko

Mikel Otero: "Trantsizio energetikoa azkartu behar da"

EH Bilduko Trantsizio Ekologikorako idazkaria den Mikel Oterok nabarmendu du klima larrialdiak, kanpo energiarekiko menpekotasunak, prezioen igoerek eta hilabeteotako hornidura arazoek agerian uzten dutela "trantsizio energetikoa azkartu beharra, eta testuinguru horretan autokontsumoa tresna garrantzitsua da arazo horiei guztiei aurre egiteko”.

Oteroren aburuz, autokontsumoak energia eskarian eta ingurumenean kalte gutxiago eragiteaz gain, "kontsumitzaileen faktura berehala jaistea ere ahalbidetzen du”.

Tramitera onartuko den legearen bidez, autokontsumorako instalazioak ezarri nahi dituztenek ez dute obra-lizentziarik eskatu beharko, salbu eta kultur-intereseko ondare edo ondare gisa katalogatuta dauden eraikinetan edo obrek egiturari edo ingurumenari eragiten dietenean.

 

 


Kanal honetatik interesatuko zaizu: Energia krisia
2024-03-25 | ARGIA
"Megaproiektu berriztagarrien egungo hedapenaren aurka eta bizitzaren alde" manifestua sinatu dute hainbat alorretako 75 pertsonak

"Elite ekonomiko baten pribilegioak iraunarazten diren aldi berean, konponbide faltsuak eskaintzen dizkigute, egiazko konponbideek beharko luketena onartu gabe: oligarkia energetikoa erabat auzitan jartzea, hazkunde ekonomikoaren aginduarekin haustea, gure eredu produktibo... [+]


2024-03-20 | ARGIA
Jasangarritasunaren Euskal Azokak hamargarren edizioa egingo du asteburuan Durangon

Berdeago Azoka egingo dute martxoaren 22tik 24ra, Durangoko Landako Gunean. Energia-eraginkortasunaz eta kontsumo arduratsuaz kontzientziatzeko helburua du Jasangarritasunaren Euskal Azokak, ingurumena babesteko irtenbideak tarteko.


Adrián Almazán
"Gizartearen logika algoritmikoarekin, gizakiak esplotatzen jarraituko dugu"

Fisikan lizentziatua eta Filosofia doktore, Gasteizen du ohiko bizitokia Adrián Almazánek (Madril, 1990), baina egun Madrilgo Carlos III Unibertsitatean ematen ditu klaseak. Digitalizazioak ingurumenean, energian eta gizartean sortzen dituen eraginak izan ditu... [+]


Trantsizio Energetikoaren eta Klima Aldaketaren legea adostu dute EAJ, EH Bildu eta PSEk

EAJ, EH Bildu eta PSE-ren babesarekin atera da aurrera. Erregai fosilen desinbertsiorako plan bat gauzatu beharko du Jaurlaritzak. Helburu nagusia 2050rako EAEn karbono emisioak zerora murriztea da.


Eguneraketa berriak daude