Alokairu eta kontratu faltsuak egiten zituen sare baten biktimak dira, eta, sarea atzeman zutenetik, okerrera egin du euren egoerak. "Kontraturik edo erroldarik gabe jarraitzen dute, etxegabetze mehatxupean, etxeetan pilatuta eta inolako etxebizitza-alternatibarik gabe", salatu du Gasteizko Etxebizitza Sindikatuak. Protesta bat antolatu dute ostiral honetarako.
Hilabete honetan hiru pertsona atxilotu dituzte Gasteizen (Araba), talde kriminal batekin lotuta: iruzur egiten zuten etxebizitzen alokairuarekin, kontraturik gabe azpialokatzen zituzten gelak eta erroldak faltsutzen zituzten, besteak beste. Sare horren parte ziren hiru pertsona atxilotu dituzte berriki, eta, ordutik, okerrera egin du euren iruzurrak jasan dituzten hainbat bizilagunen egoerak. Gasteizko Etxebizitza Sindikatuak, zehazki, Prado kaleko 4. atarian bizi diren lagunen egoeraren berri eman du.
"Kontraturik edo erroldarik gabe jarraitzen dute, etxegabetze mehatxupean, etxeetan pilatuta eta inolako etxebizitza-alternatibarik gabe", azaldu zuten atzo Etxebizitza Sindikatuko kideek, agerraldi baten bidez. Aurreko astean, gainera, "ezkutuko argi mozketa" bat izan zen: kontratatutako tentsioa murriztu du etxe horien azpierrentatzaileak.
Etxejabeak, errentatzaileak nahiz erakundeak arduradun
"Egoera horren arduradunak seinalatu" ditu Etxebizitza Sindikatuak. Jopuntuan jarri ditu, batetik, "etxejabeak eta errentatzaileak": "Pertsona askoren egoera zaurgarria baliatzen dute irabaziak ateratzeko, bide estralegal zein ilegalak erabiliz; hau da, mehatxuen eta derrigortzeen bitartez, gela bakar batean pertsonak pilatuz, alokairuen baldintzak modu aldebakarrekoan aldatuz, espazioen pribatutasuna urratuz, hornidurak moztuz, eta abar".
"Instituzio burgesen ardurari" ere egin diote azpimarra sindikatuko kideek, bestalde. Zehazki, Gasteizko Udalari egin diote erreferentzia. "Errolda eskuratzeko udalak berak jartzen dituen zailtasunengatik, hainbat dira etxejabeen iruzur eta abusuen menpe bizi behar direnak", jakinarazi dutenez. Gainera, salatu dute, "sare kriminalaren biktimak babestu beharrean, lehen baino babesgabeago utzi" dituela udalak: "Etxebizitza-alternatibarik ez eskaintzeaz gain, etorkizuneko abusuak eteten ere ez da saiatu".
Aldarriak eta mobilizazioa
Etxebizitza Sindikatuarekin batera, borrokara jo dute Pradoko 4. zenbakiko bizilagunek, eta hiru aldarri egin dituzte: "Maizterren kontrako etxegabetze prozesu oro etetea modu automatiko eta baldintza gabekoan, murriztutako horniduren berrezarpen berehalakoa eta errolda kaltetutako pertsonentzat".
Mobilizazio deialdi bat ere egin dute ostiral honetarako, martxoaren 31rako. Pradoko 4. zenbakiko etxebizitza blokearen aurrean izango da protesta, 19:00etan hasita. "Etxejabeen inpunitatea" salatuko dute elkarretaratzean, baita "instituzioen rol konplizea" ere.
Babes Ofizialeko Etxebizitzetan bizi dira familiak, eta La Caixak ez dizkie alokairu-kontratuak berritu nahi. Bilboko Etxebizitza Sindikatuak salatu duenez, bizilagunak kaleratuz, "alokairu sozialetatik aberasten da" banketxea. "Etxegabetzeak berehala eta... [+]
EAJren asmoa da legezko aldaketa azkar bati ekitea, 48 orduko epean etxegabetzeak egin ahal izateko etxebizitzak okupatzen diren kasuetan.
Bilatu dituzten beste etxeetako jabeek ez diete etxerik alokatu nahi izan familia ugaria, soldata bakarra eta atzerritar jatorrikoak izateagatik.
Pasaiako portuko langileen familiak bizi diren Trintxerpeko etxebizitza bloke bat bota nahi dute Pasaiako Portu Agintaritzak eta Euskal Trenbide Sareak, 400 metro inguruko trenbide zati bat egiteko. Lau hilabetetan etxea utzi behar dutela ohartarazi diete.