Lurzaindia elkarteak eta ELB sindikatuak astelehenean jakinarazi dute Arbonako Berrueta eremuko hiru etxe eta lau lur hektarea erosteko asmoa zuen Parisko bikoteak atzera egin duela bere erabakian. Hiru milioi euro ordaintzekoak ziren Berroetako lurrengatik. Oraingoz, ahoz bakarrik eman dute jakinarazpena, eta eragileak idatzizko agiriaren zain daude. Halakorik iritsi ezean, “ekintzetara itzuliko” direla ohartarazi du Dominika Ameztoi Lurzaindiko eledunak.

Bestalde, ELBk eta Lurzaindiak abisatu dute gainerako hamabi hektareak erosi dituen Pauline Desurmont laborariaren kontra auzitara joko dutela. Salerosketan “azpijokotan” ibiltzea leporatu diote. Izan ere, ohiko prozeduretan, SAFER espekulazioaren aurkako egiturak du erosteko lehentasuna, eta berak banatzen ditu laborarien artean lurrak, hautagaien baldintzak aztertu ostean.

“Lehentasunik izango ez zuela jakitun”, Desurmontek gezurra esan izana salatu dute lurren aldeko defendatzaileek. Lurrak erosterako orduan, Bidarten (Lapurdi) bizi zela esan zuen. Sindikatuko eta elkarteko kideek hori gezurtatu nahi izan dute, Etxebizitza Larribarren (Nafarroa Behera) duela publiko eginez, Berruetatik 80 kilometrora. Bidartekoa familia etxea dela diote, eta asteleheneko agerraldia haren parean egin dute, protesta gisa.

Joan den astean,  Berroetako lurren jabetza soila erosi zuen Desurmont laborariak, 200.000 euroan, gozamen-eskubiderik gabe. Hala ere, eragileek uste dute "hiru urteko epean" erosiko duela gozamen-eskubidea ere. SAFER egiturak 100.000 euro ingurutan estimatu du prezioa. Hori dela-eta, pasa den irailaren 29an Baionako notariotza bulego bat okupatu zuten, salmenta “muntaia finantzario bat” zela aditzera emateko. Lurzaindiak eta ELBk adierazi dute lur hauen salmentaren borrokan buru-belarri sartuak dabiltzala, beldur direlako nabarmen espekulatuz gero, inguruko lurrentzat ere prezio horiek ezarriak izateko arriskua biderkatzen dela.