Olive Kitteridge
Lisa Cholodenko
AEB, 2014 / 4 kapitulu

AEBetako Maine estatuko herrixka batean bizi den irakaslea da Olive Kitteridge. Depresioaren mugan irautera ohitu den emakumea. Elizabeth Strouten nobelan oinarritutako telesail honek lau ordutan kontatzen du Oliven eta bere familiaren 25 urteko historia. Eneritz Arzallus Alustiza

* * * * * * * * * *

Natura Bizia
Lexeia Larrañaga
Euskal Herria, 2021 / 81 minutu.

Euskal Herrian naturaz gozatzerik badela erakusten du lan honek. Animalia handienetik txikienerainoko bidaian, desagertzear diren bisoi europarraren eta basoilarraren eszena inoiz filmatu gabeez, edo Europako tximeleta ederrenetakoa den Graellsia isabellae-ren metamorfosiaz goza liteke. Gizaki, klima eta naturaren arteko lotura agerian geratuko zaigu beste behin. Urko Apaolaza Avila

* * * * * * * * * *

A secret love
Chris Bolan
AEB, 2020 / 83 minutu

Historia indartsua oinarri duen dokumental xumea: Pat eta Terry lesbiana bikotea dira, 65 urte daramate elkarrekin, baina gizartearen eta gertuko senideen begietara urte horietan guztietan etxe berean bizi diren lagun onak baino ez dira. Orain, beren sekretua hurbilekoei kontatzea erabaki dute, eta hor abiatzen da dokumentala. Mikel Garcia Idiakez

* * * * * * * * * *

La Linterna de Diogenes
Arkadio irakaslea (Irola Irratia)

Arkadio irakasleak 300 irratsaiotik gora daramatza batik bat behetik kontatzen den historiari bozgorailua ematen, tarteka zientziari, soziologiari, edota filosofia ere tokia eginez. Urtetako jardunak emandako esperientziatik, maneiuz betetzen ditu garrantzizko eginkizunak: ezagutzaren dibulgazioa eta oroimen historikoaren transmisioa. Autobusean, afaria prestatu bitartean… edozein une da aproposa birpasatu, ikasi eta hausnartzeko. Amaia Lekunberri

* * * * * * * * * *

Anomia
Alba (Bidehuts)
2019 / 37 minutu

Egunsentitik ilunabarrera naturaren bidea oroitarazten duten lau kantu instrumentalek osatuta, Hazparneko Alba boskoteak disko bikaina atera zuen orain bi urte. Post-rock estiloan, barearen eta ekaitzaren arteko nahas-mahasean ibili dira bi bateria, bi gitarra, baxua, eta teklatua. Lander Arbelaitz Mitxelena

* * * * * * * * * *

Las Raras
Catalina May eta Martin Cruz
2016ko udatik, bost denboraldi

Bizi dugun eta eraiki nahi luketen munduari buruzko hausnarketak, egitura narratibo sendoarekin. Kazetaritza hutsa. Kalean egiten dena. Inspiratzaileak izan daitezkeen bizipenak jasoz –sarri oso intimoak–. Askotariko arauak desafiatzen dituzten pertsonak oinarri, hemen eta orain posible denaren mugak zabaltzen dituztenen bizipenak. Axier Lopez

* * * * * * * * * *

Brassic
Daniel O’Hara, Jon Wright, Saul Metzstein
Erresuma Batua, 2019 / 6 kapituluko 2 denboraldi

Vinnie protagonista eta haren lagunak kalamidade koadrila iruditu dakizkioke bati lehen kolpean, baina beren ondoan denbora igaro ahala, begiko egingo zaizkio. Azken kapiluaren ostean, haien eskutik saltsan ibiltzearen mira izan dezake istorioari lotzen zaionak. Telesailen gainprodukzio garaiotan, gutxik lortzen dute halakorik. Amaia Lekunberri

* * * * * * * * * *

Pieces of a Woman
Kornél Mundruczó
Kanada, 2020 / 126 minutu

Erditze gogorrean haurra galdu duen emakume baten istorioa kontatzen du filmak. Lehen ordu erdi deseroso eta hipnotikoaren ostean hasten da dena aldatzen: bikote harremanaren gorabeherak, emaginaren aurkako prozesu judiziala eta ulertzen zaila den dolu prozesua gurutzatzen direnean. Eneritz Arzallus Alustiza

* * * * * * * * * *

Les hirondelles de Kaboul
Zabou Breitman, Eléa Gobbé-Mévellec
Frantziako Estatua, 2019 / 80 minutu

1998ko uda. Enararik ez da ikusten jada Kabulen. Bele beltzak besterik ez dabiltza orain hegan, talibanek menpean duten hiriko etxeen gainean. Film hau ez balitz animazioazkoa, gogorra litzateke, jasanezina ia. Baina akuarelaz margotuak diruditen irudiek leundu egiten dute istorioak kontatzen dituen izugarrikeriak. Jon Torner Zabala

* * * * * * * * * *

Cachada
Marlén Viñayo
El Salvador, 2019 / 82 minutu

Magaly, Wendy, Magda, Chileno eta Ruth San Salvadorko kaleetako saltzaileak dira. Abentura berrian murgiltzera doaz Egly Larreynaga aktore eta zuzendariarekin batera: antzerki konpainia bat sortu eta beren bizitzak eszenaratu. Esperimentu gisa hasitakoa bizitza aldatzeko aukera bilakatuko da. Maitane Gartziandia

* * * * * * * * * *

Love, Death and Robots
Tim Miller
AEB, 2019 / 13 kapituluko 2 denboraldi

Helduentzako animazioa deitzen diote, marrazkiak mugimenduan jartzea umeen kontua balitz bezala. Azkar eta labur esanda, Black Mirror estiloko 15 minutuko 26 pilula solte, baina cyberpunk ukituarekin eta animazio estilo ugariak erabiliz, 2D klasikotik hasi eta egungo teknikarik fotorrealistenetaraino. Zientzia, fantasia, kritika soziala… eta robotak. Axier Lopez

* * * * * * * * * *

Kona fer í stríð
Benedikt Erlingsson
Islandia, Frantzia, Ukraina
2018 / 101 minutu

Halla, 50 urteko emakume diskretua, itxuraz bizi sinplea eta lasaia daramana. Baina ez: Islandian kokaturiko Rio Tinto multinazionala dauka jomugan, eta sabotajea bidetzat. Ama Lurraren defentsan, erradikalak izateko dei politiko eta poetikoa da Kona fer í stríð, frantsesez eta gaztelaniaz ikusgai. Jenofa Berhokoirigoin