Astelehenean, eguerdi partean, Argiako erredakziora hurbiltzen denak hutsik topatuko du seguruenik. Astekariaren edukiak erabakitzeko bilduta daude. Aste horretan osatu beharreko aldizkariaren edukiak zehaztuta daude ordurako. Baina aurrera begira lantzeko gaiak proposatzen dira, aurreikusitako gaiak zer datatan argitaratuko diren eta zenbat orrialde hartuko dituzten zehazten da, edo iragarkiak zer tokitan sartuko diren erabakitzen da, besteak beste. Kaleratutako azken aldizkariari ere errepasoa egiten zaio aste hasierako bileran, ondo eta gaizki egindakoa baloratzeko.

Argiako eduki batzuk erredakzioko kazetariek beraiek idazten dituzte eta beste batzuk kolaboratzaile sareak sortzen ditu. Erredaktoreek kolaboratzaileen testua jaso, atondu eta zuzentzen dute. Argazkiak edo irudiak lortuta, erredaktoreak berak egiten du erreportajearen maketa. Horrenbestez, erredakzioko kideen ordenagailuetatik edukiak maketatuta irteten dira, beranduenez ostegunean, osteguna baita astekaria ixteko eguna.

Argiak Antzarekin lotzen duen atea zeharkatzen du orduan, Antza arduratzen baita maketak bildu eta txukuntzeaz, eta publizitateak eransteaz. Halaber, astekaria filmatzea Antzako diseinu grafikoko kideen lana da.

Bide laburra egin behar du aldizkariak inprentara iristeko; Antza inprimategia Argiako egoitzaren pareko pabilioian dago.
Argiaren mamia itxita, ostiraletan azala finkatzen da. Astean zehar hainbat bide landu eta gero, azal bat baino gehiago izaten da aukeran. Irudia erabaki, titularrak zehaztu eta azala ere filmagailutik pasatzen da inprentara iritsi baino lehen.

Aldizkariak hurrengo astearen hasieran irtengo dira labetik. Eta astebururako harpidedunen etxeetan eta saltokietan izango dira. Ale batzuk ez dira urrutira joango; hurrengo astelehenean erredakzioko kideek erabiliko dituzte Argiaren zenbaki hori baloratzeko.

Baina erredakziora joan ordez eskilarak igotzen dituenak Argiak ideietatik paperera egiten duen bidea azaldutakoa baino konplexuagoa dela ikusiko du. Goiko solairuan daude kudeaketaz, publizitateaz, harpidetzez eta Argia.com-ez arduratzen direnak.

Eta edukiak erabaki, idatzi, maketatu, filmatu eta inprimatzeaz gain, goiko bizilagunak beharrezkoak izango dira, Argiak beste 90 urte iraungo badu.