«Aldea handia da bai. Nik 24 urte ditut eta 14 daramatzat bizikletan eta azken aldian ikusi dut urtetik urtera txirrindularitzan, eta kirolean oro har, zabaltzen ari dela emakumeak ere kirola egiten duenaren diskurtsoa. Normala ikusten dut oraindik baldintzak berdinak ez izatea, aldaketa ezin delako egun batetik bestera gertatu. Mutilek ez eze, neskok ere emaitza onak lor ditzakegula erakutsi dugu eta garrantzia ematen hasi dira. Hiru urte egin ditut Italian eta orain Euskal Herrian geratzea erabaki dut. Hemendik joan nintzenean emakumeen egoera oso bestelakoa zela badakit, eta egoerak hobera egin duela. Talde gutxi egon arren indartsuagoak dira eta babesleek ere badute interesa. Niri, esaterako, Orbeak asko lagundu dit, ez nago talde batean, baina ez eskaintzarik ez dudalako, horrela erabaki dudalako baizik. Beste bi neska ere ni bezala daude, baina ez dago lehiatzeko arazorik, Espainiako lasterketetan parte har dezakegu eta kanpora Espainiako selekzioarekin joaten gara. Eguneroko harremanari dagokionez, mutilekin ez dago alderik, orain esaterako, Benidormen ari naiz entrenatzen, 30 mutilekin, eta ni beste edonor bezala entrenatzen naiz».