George W. Bush Estatu Batuetako eskola batera joan da bisitan. Ikasgela batean sartu da, beti bezala bere bizkarzainak alde banatan dituela. Orduan, Amerikaren inguruan, amerikar izatearen urguiluaren inguruan eta abarren inguruan bere diskurtsoa botatzen hasi da. Amaitu eta galdera hau bota die haurrei:

-Inork zalantzarik ba al du?
Ikasgelaren atzealdean haur batek eskua jaso eta horrela esan dio:
-Nik! Kaixo, Jimmy naiz eta hiru galdera egin nahi nizkizuke:
1. Zergatik faltsifikatu zenituen hauteskundeak?
2. Zergatik ez zenuen ebitatu Irailak 11koa?
3. Zergatik saiatzen ari zara Iraken kontrako gerra probokatzen?
Une horretan jolas garaiko txirrinak jo eta denak kanpora doaz. Jolas garaitik itzuli eta Bushek hitza hartu du berriro:
-Ongi da. Inork beste zalantzarik ba al du?
-Nik! Kaixo, Tommy naiz eta bost galdera egin nahi nizkizuke:
1. Zergatik faltsifikatu zenituen hauteskundeak?
2. Zergatik ez zenuen ebitatu Irailak 11koa?
3. Zergatik saiatzen ari zara Iraken kontrako gerra probokatzen?
4. Zergatik jo du txirrinak 20 minutu lehenago?
5. Non dago Jimmy?

Internet bidez lagun batek bidalitako txiste honi esker, agian, bateren bat barre-algaraka hasiko zen. Alegia, poz bizia eta bat-batekoa adierazteko aurpegiko muskuluak modu berezian mugituko zituen, horrekin batera hasperen zaratatsuak eginez (entziklopediak hori dio behintzat). Eta aurpegiko muskuluez gain, sabeleko muskuluak, diafragma eta barruan ditugun beste hainbat gauza ere mugituko zitzaizkion. Ekintza hori egiteko agindua bere garunetik etorriko zitzaion, zehazki garuneko ezker-goiko aurreko zirkunboluzioan kokaturik dagoen bi cm2-ko gune batetik (Kaliforniako Unibertsitateko ikerle talde batek hori deskubritu du behintzat).
Barre egitean ondo sentituko zen gainera, hurrengo orrialdeetan azalduko ditugun barrearen efektu onuragarriek eraginda. Eta beharbada hobeto sentituko da, egin berri duen hori gaitasun esklusiboa dela jakitean. Gizakia baita munduko espezie guztien artean irribarre eta barre egiteko ahalmena duen espezie bakarra.
Egia da hienak barre egiten dutela esan ohi dela. Animalia hauek egiten dutenak, itxuraz gizakien barrearen antza du, baina ez du zerikusirik poza sentitzearekin, krokodiloen malkoek nahigabearekin zerikusirik ez duten bezala. Gainera hiena gaixoek daramaten bizimodua kontuan hartuta, ez dirudi barre egiteko arrazoi gehiegirik dutenik.
Egia da, era berean, Tarzanen filmetan Txita txinpantzea behin eta berriro ikusten dugula barrez, itxura batean behintzat. Txitari hainbatetan ikusi diogun keinu hori, gure lehengusu txinpantzeek naturalki egiten dute. Ez, ordea, poz adierazpen modura. Barrea dirudien keinuaren bitartez, indartsuago diren beste txinpantzeekiko errespetua eta beldurra adierazten dute. Itxuraz antzekoak diren bi keinu hauen artean harremanak aztertzen saiatu da hainbat etologo. Agian, lehen gizakiek barre edo irribarrearen antzeko keinua errespetuz egingo zuten eta errespetu hori denborarekin poz bihurtuko zen... Baina oraingoz ez dira ausartzen baieztapenik egitera.
Baieztatu dezakeguna da, beraz, barrea gizakion gaitasun esklusiboa dela. Eta ariketa osasungarria dela. Eta euskaldunok esaten dutena baino sarriago praktikatzen dugula