Hernani eta Astigarragan ibaiak lokal batzuk hartu zituen baina, ez zuen joan den azaroko denboraleak eragindako triskantzarik eragin.

Oiartzun ibaiak ere estu eta larri ditu oraindik Oiartzun, Lezo eta Errenteriako herritarrak. Orain arte bere bidean doa ibaia baina zaintzen ari dira.

Behobian antzeko egoeran daude, Bidasoa ibaiak orain arte ez du gainezka egin baina Nafarroan egiten ari den euri jasak eta Itsagorak ibaia bere tokitik aterako duen beldur dira.

Urola Kostan berriz, Zarautz eta Zumaia arteko kostako errepidea moztuta dago eta Meagasetik desbideratu dute trafikoa. Bestalde, Zarautzen Urteta auzora joateko bidean ere urak gainezka egin du.

Aian ere urak eragin ditu arazoak San Pedro auzoaren parean gainkarga ekarri du eta bere bidetik irten eta bertara iristeko errepidea hartu du.

Gaur goizaldean berriz, Azpeitiako Aratz- Erreka auzoko Zuola baserrian etxeko kide guztiak atera behar izan dituzte. Inork ez du hartu minik baina Uztarria.com-en arabera, kalte materialak handiak dira. Atzo Uztarria.com-en ateratako informazioaren arabera, Nuarbeko Urtegia %101,17ra beteta zegoen.

Goierri aldean  luiziak izan dira hainbat tokitan. Kasu honetan mendiko urak eragindako luiziak izan dira. Seguran bi luizi izan dira eta Zegaman beste bat. Atzokoan Eredu enpresa itxi egin behar izan zuten eta langileak bertatik atera, luizia egin zelako enpresaren goialdean. Bertan, tentsio altuko lineak eta argindar transformatzaileak beldurra sortu dute inguruko pinuak gainera eroriz gero sua eragin dezatelako. Gaur goizaldean berriz, hainbat bide itxi dituztela jakinarazi du Goierriko hitzak.

Bizkaiari dagokionez, Barakaldo, Getxo, Lekeitio eta Galdakaon izan ziren atzokoan arazo nagusienak. Busturialdean eta ere izan dira hainbat arazo.

Araban Zadorra ibaiak Agurainen eragindako kalteez aparte ez da arazo larririk izan.

Nafarroan, atzokoan Baztan eta Arga ibaiek eragin zuten arazo gehien Iruñeam eta Atarrabian uholdeak eragin baitzituzten. Gaurkoan berriz Arga ibaia zaintzen dihardute Etxaurin, Larragan, Berbintzanan, Miranda Argan Faltzesen eta Azkoienen.

Iparraldean Urdazuri ibaiak Ainhoa,Ezpeleta eta Senperen uholdeak eragin idtu. Aturrik ere gainezka egin du Ahurti parean.

Hego Euskal Herrian goizeko itsas gorak ez du arazorik sortu eta euri gutxiago ari duenez uholde arriskua gutxitu egin da. Ipar Euskal Herrian berriz arratsalde partean euria hasiko duela iragarrita dagoenez, berriro ere alerta piztu behar dela adierazi du Prefekturak.