Gaindegia Euskal Herriko Ekonomia eta Gizarte Garapenerako Behategiak egin du ikerketa. Iazko turismo datuak bildu eta aurtengoekin konparatu ditu.

Egonaldi laburrak

Nabarmendu duenez, turistek gero eta denbora gutxiago pasatzen dute Euskal Herrian. Era berean, gaualdi kopurua ere murriztu egin dute. 2012ko emaitzen arabera, bidaiari bakoitzak 1,88 egun pasatzen ditu –2013ko zehaztapenik ez dute eman–.

Lapurdiri eragin dio gehien egonaldiak laburtzeak. Izan ere, gaualdien %85,6 egiten da bertan.

Urte gazi-gozoa

2013ko balorazioak ondorio “gazi-gozoak” uzten dituela uste dute Gaindegiko kideek. Hegoaldeko probintziak lurraldez lurralde ikertu dituzte. Diotenez, Hegoaldeko bidaiari kopuruak %0,9 egin du gora. Aitzitik, gaueldiek %1,3 egin dute behera, eta horregatik urritu dira lanpostuak.

Nafarroako turismoak ditu emaitza onenak: %6,3 igo da. Gipuzkoan ere 2,5 egin du gora. Txanponaren beste aldea Arabako kasua da, bisitarien portzentaia %9,2 jaitsi da –Txostenean ez dute gainontzeko herrialdeen aurtengo xehetasunik eman–.

Okupazio tasari dagokionez, %44,1ekoa da aurten, 2012koaren oso antzekoa.

Turismo sostengarria helburu

Txostena osatzeaz gain, sektorearen inguruko balorazioa egin du Euskal Herriko Ekonomia eta Gizarte Garapenerako Behategiak. Haien esanetan, turismoa “ona” da, beti ere sostengarria bada. Zonaldeen “iraunkortasuna” eta enplegu “duina” bermatu behar du. Hala, gogorarazi dute Ipar Euskal Herriko lanpostuen %6 turismoarekin lotuta dagoela, ondorioz, “prekarioa” dela eta gazteak alde egitera bultzatzen dituela.

Salatu dutenez, ez dago Euskal Herri osoari so egiten dion plan estrategikorik. Are gehiago, bisitariak erakarri asmoz, probintziak haien artean lehiatzen direla deritzote. Horregatik, argi dute zein den sektorearen eginbeharra: herri ikuspegia txertatzea.