“PP ez baldin badago prest onartzeko euskararen erabilera modu integratzailean sustatzea helburu duen proposamen hau, ez da beste biderik geratuko eta PPri arrazoia eman beharko zaio akordio proposamena erretiratuz, egingo ez duguna zera baita: haiei arrazoia eman eta euskara tresna bezala erabili desadostasunak sortzeko”. Sabin Anuzita Bilboko Udaleko Euskara, Gaztedia eta Kirol arloko zinegotziak horrela esplikatu du “Euskararen Bilbo” dokumentua atzera bota izana.

Dokumentuak 14 puntu biltzen ditu eta lehentasunezko ildotzat dauka belaunaldi berriek euskaraz jakitea eta erabiltzea. Besteak beste, euskara egunero ohiko hizkuntza den guneak zaintzea, indartzea eta hedatzea du xede testuak, baita euskal hiztunen komunitatea trinkotzea ere, bai kalean, bai Interneten. Laburbilduz, euskararen normalizazioa helburu duen dokumentua zen Bilboko Udalean onartu beharrekoa.

Luis Hermosa Bilboko Udaleko PPko ordezkariak 14 puntuen “bertsio kritikoagoa” egin dadila eskatu zuen ordea, “denentzako errespetua” eskatuz, “hitz egiten dutenentzat eta hitz egiten ez dutenentzat”. Hermosaren aburuz “euskarak elementu integratzailea” izan behar du eta eztabaidatutako dokumentuak herritarrak banatzen ditu, bere esanetan. PPko bozeramailea harago joateko zorian egon zen, baina dokumentuaren zenbait aspektu deskribatu gabe utzi zituen azkenik.

Gauzak horrela, PPren ezezko jarrerari kasu egiteagatik, dokumentua bidean geratu da eta batzordean aztertu beharko da berriz. Horretarako datarik jarri gabe amaitu zen asteazkeneko Udaleko saioa.