Larunbatean ospatuko dute lehen Kuba Eguna Bilbon
Helburu bikoitza du Euskadi-Cuba, Desembarco del Granmak eta Sierra Maestra elkarteek Euskal Herrian lehen aldiz antolatu duten Kuba Egunak. Batetik, Kubako kultura jendarteratzea eta, bestetik, aldarrikapena egitea. Fidel Castrori gorazarre egitea eta AEBen blokeo ekonomikoaren behin betiko amaiera eskatzea, alegia.
Bihar, larunbata, hilak 17, Areatzako Tingladoetan Fidel Castrori "omenaldi bihotzekoena" egingo diote. "Iraultza kubatarreko liderra eta historia garaikideko politikari handienetakoa" izan delako Euskadi-Cuba elkarteko kideen esanetan.
Bestelako aldarrikapenak ere izango du lekua egitarauaren baitan. AEBetako Trump presidenteari "AEBek uharteari ezarritako blokeo ekonomiko, finantziero eta komertzialaren behin betiko amaiera" eskatuko diote. Izan ere, elkarteak adierazi duenez, blokeoak "ikutu gabe jarraitzen du", kubatarrei "bitartekoen gabezia sorraraziz eta era guztietako sufrimendua eraginez".
Kuba Egunak aldarrikapen "historikoa" ere berpiztuko du larunbatean: "Legez kanpo okupatutako Guantanamoko lurraldearen itzulketa, blokeoak 60 urtetan eragin duen kaltearen indemnizazioa; eta esku-hartze, gerra mediatiko eta ezegonkortze programen finantziazio milioidunaren amaiera" exijituko dituzte.
Bestetik, ospakizun eta jai kutsua ere izango du. Kuba Egunak uharteko "musika, dantza, erlijio eta kirola" gerturatuko ditu Bilboko Areatzara, bilbotarrek bertatik bertara ezagut ditzaten.
Biharkoa data esanguratsua da kubatarrentzat, San Lazaro eguna ospatzen dutelako (Babalú Ayé astikerian erabiltzen den hitza) eta bi urte betetzen direlako AEB-Kuba arteko diplomazia harremanak berreskuratu zituztela. Bi urte pasa dira baita "bost heroi kubatarrak" askatu zituztela, "era bidegabean AEBetan preso izan eta gero".
Egitaraua
11:00 Puzgarriak, umeentzako jolasak, antolatzaileen informazio mahaiak, Kubako artisautza, xakea, Kubako dominoa eta erakusketak.
12:00 Mahai ingurua (Ramon Bustamantek moderatua): Cuba: el legado de Fidel y el futuro de la Revolución”.
13:30 Kantaldi parte-hartzailea eta Fideli omenaldia, Orlis Pineda trobadore kubatarraren eskutik.
18:00 Dantzaldi kubatar parte-hartzailea.
18:45 Dantza San Lazarori (Babalú Ayé), Sierra Maestra taldea.
19:00 Orlis Pineda trobadore kubatarrak Baracoa diskoa aurkeztuko du (Matthew hurakanak kaltetutako gunea).
20:30 Havana 537 taldearen kontzertua.
Albiste hau Bilboko Uriolak argitaratu du eta CC-by-sa lizentziari esker ekarri dugu ARGIAra.
Hiru militante euskaldun itsasoratuko dira Gazara bidean apirilaren 21ean, Turkiatik irtengo den Askatasunaren Ontzidian: Pili Revilla, Agus Gorbea eta Mikel Zuloaga ‘Mikelon’. Ostegunean hartu dute Bilbotik Istanbulera eraman dituen hegaldia, eta bi egun lehenago... [+]
Munduko dozenaka erakundek osatzen dute Askatasunaren Ontzidia eta bere helburua da 2007az geroztik Israelek Gazari jarritako blokeoa haustea. Iragan urriaren ondoren blokeo hori erabat areagotu da, eta flota horrek Gazara iristeko saioa egingo du datozen egunetan.
Herritarrok kalera irten gara behin eta berriro Palestinarekin elkartasuna adierazteko. Herriaren nahia argi utzi dugu. Hala ere, instituzioek gor eta tinko jarraitzen dute sionismoari arnasa ematen. Palestinar herriak sufritzen duen genozidioaren inguruko berriak (zaharregiak... [+]
Abenduaren 22an Azpeitiko herriko plazan egingo dute Gazako sarraskia salatzeko ekimena. Herritarrek bata bestearen atzetik irakurriko dituzte ahoz goran Israelek hil dituen dozenaka milaka palestinarren izenak.
Abya Yala historia zapalkuntzaz beteriko bizitza dela esan daiteke. Bertako aberastasun naturalek paper garrantzitsua betetzen dute munduko burgesiaren metatze prozesurako.