Rufian eta Rajoyren arteko eztabaida Kongresuko osoko bilkuran jazo zen, Defentsa eta Hezkuntza ministerioek “defentsaren kultura” ikasgaia ezarriko duen akordioa sinatu ostean.

“Beti pentsatu izan dut oso positiboa dela gazteek Konstituzioak jasotzen dituen balore unibertsalak, sozialak eta demokratikoak errespetatzen ikastea”, esan zuen Espainiako presidenteak. Honen aurrean, ERCko diputatuak 1939ko “abertzale espainiarrak” hezteko  arau sorta bat irakurri zuen: “Hau berreskuratu nahi duzu 80 urte ondoren?”.

Rajoyk azpimarratu zuen oso garrantzitsua dela gazteak askatasunean, berdintasunean, tolerantzian eta legearekiko errespetuan heztea, eta jakin dezaten “askatasunaren defentsan” Indar Armatuek egiten duten lana.

Rufianek, baina, kontra egin zion berriro ere: “Guk bakar-bakarrik nahi dugu herrialde bat non haurrek lehenago jakin dezaten zer den solidaritatea eta senidetasuna Legioa eta ahuntza baino; non lehenago jakin dezaten nor den Marcos Ana Letizia Ortiz baino. Orain 80 urte zuek lapurtu zeniguten herrialdea berreskuratu nahi dugu”. Bestalde, Kataluniako ikasgeletan doktrinatu egiten dela esateari uzteko eskatu zion Espainiako Gobernuari.

Defentsaren kultura 2015ean sinatutako akordio bati atxikiko zaio, zeinen bidez “Hiritartasuna” eta “Etika” ikasgaiak ezarri ziren. Maria Dolores de Cospedal Espainiako defentsa ministroak hilabeteon eskola pribatuekin adostu du 2015eko akordioa zabaldu eta defentsaren kultura haurrei irakastea.