Aitziber Ibaibarriaga zinegotziak oso kezkagarritzat jo ditu datuok: “2011tik aldatu ez den argazki finkoa daukagu, eta gaikako bilketari dagokionez argazki negargarria da”. Ibaibarriagaren ustez, Udal gobernuak ez du ez planik ez helbururik hondakinen kudeaketaren alorrean.

“Super Mentxu heroi penagarria aurkeztu zutenetik ez dute ezer egin, eta 2012az geroztik ez dugu Super Mentxuren berri izan”, adierazi du Ibaibarriagak.

2013an bosgarren edukiontzia hiri osora zabaltzeko mozioa onartu zen, baina oraingoz Deustun baizik ez dago, esperientzia pilotu modura. Auzo horretan lortutako emaitzak ere kritikatu ditu Aitziber Ibaibarragak: zabor tasa ordaintzen dutenen %12k baino ez dute bat egin proiektuarekin, “Udalak ez baitio publizitaterik eman”.

EH Bilduren proposamenaren ardatza 2013ko mozioan onartu eta bosgarren edukiontzia Bilbo osora zabaltzea da, janari gordina ez ezik prestatutakoa ere batzeko aukera eta guzti, orain dela hilabete batzuk Bizkaiko Aldundiak irekitako bidetik. Horrekin batera, berrerabilpenari eta birziklatzeari buruzko dibulgazio lana egin beharra azpimarratu dute.

Hondakinen gaikako bilketari arreta berezia ematen dioten beste hiri handi batzuetako ereduak aztertzeko ere eskatuko dute: Donostia, Brusela, Erroma, San Frantzisko…