Anes al-Libi atxilotu zuten Libian aurreko astean tropa estatubatuarrek, FBI eta CIAren agindupean, Al Qaedako buruetako bat izatea leporatuta. Atxiloketa isilpean egin zen, Libiako gobernua abisatu gabe. Horregatik, hika-mika sortu du gaiak.

Estatu Batuetako prentsak dionenez, egun AEBetako armadaren itsasontzi batean dute estatubatuarrek Anes al-Libi, meditarraneo itsasoan. Bertan, abokatu baten babesik gabe, galdekatzen ari dira. Estatu Batuetako hedabideek diotenez, litekeena da akusatuari bere eskubideen berri ere eman ez izana.

Libiako behin behineko gobernuak esan du ez dela atxiloketa, “bahiketa” baizik. AEBetako estatu idazkari John Kerryk erantzuna dio, eta atxiloketa “bidezkoa eta legezkoa” dela nabarmenduz.

Kanpo esku hartzeak hautsak harrotu ditu Libiako gizartean; atxiloketaren baldintzak direla eta, Libiako Kongresuak Anes al-Libi “berehala” askatzeko agindu die EEUUei. Omar Hmidan Kongresuko bozeramailearen iritziz, “burujabetasunaren bortxaketa” izan da AEBen ekintza.

Washingtonek, baina, ezezkoa eman dio Tripolitik egindako eskaerari. Atxilotutakoari “begirunezko tratua” eman diotela ziurtatu du Deborah Jones AEBetako Libiako enbaxadoreak.

Bushek abian jarritako legeetan oinarrituta bultzatu du Obamak atxiloketa. Lege horien babespean, ohikoa da terrorismo gaiekin atxilo hartutakoei abokaturik gabe galdeketa egitea.

Ez da gerra, “mugatutako ekintza militarrak” dira

Barack Obama Libiako egoeraren harira mintzatu da bart gauean, eta gerrari buruz hitz egitea ekidin du. Horren ordez, Libian egindako operazioak “mugatutako ekintza militarrak” direla esan du.

Obamaren iritziz, “gauza bat da zuzenean AEBen kontra konspiratzen ari diren terroristak atxilotzea, eta beste gauza bat gerra bat abiatzea”. Hala, gerra berri bati buruzko usteak uxatu nahi izan ditu.