Ekoedizioa: Nola murriztu liburuak sortzen duen kutsadura
Duela urtebete sortu dute Ekoedizioaren Institutua Katalunian, paperezko argitalpenek ingurumenean eragiten dituzten ondorioak gutxitzeko asmoarekin. Ekoedizioak bete beharko lituzkeen hamabi irizpide zehaztu ditu institutuak, eta liburua ekoeditatua dela ziurtatzen duen zigilua ere sortu du. Europan halako zigilua kudeatzen duen institutu bakarra da. Kataluniaz haratago ere sortu du interesa proiektuak. ARGIA duela hilabete batzuk hasi da liburuak ekoedizio moduan argitaratzen eta Kataluniako Ekoedizioaren Institutuko bazkideen artean Euskal Herriko aurrena da.
Badakigu maiz ez dela jasangarria kontsumitzen ditugun produktuak sortzen diren lekutik gure etxera iristerainoko bidea, ingurumenaren ikuspegitik. Produktu ekologikoak ditugu elikagaietan eta arropetan, elektrogailuetan kaltea gutxitzeko programak daude eta garraio publikoa edo bizikleta erabiltzeko aholkatzen digute, norbera bere autoan ibili beharrean. Baina badakigu irakurtzen ari garen liburuak zein bide egin duen gure eskuetara heldu aurretik? Badakigu zenbat kutsatu duen hura sortu eta garraiatzeak?
Galdera horri tiraka hasi ziren ikertzen liburu baten arrasto ekologikoa Pol·len argitaletxeko kideak, duela hamabi urte; ikerketa horien ondorio dira ekoedizioaren kontzeptua eta proiektua. Argitaletxea sortu aurretik Bartzelonan inprenta bat zuten: El Tinter kooperatiba. Ingurumen zientziak ikasten zituen ikasle batek bertan egin zuen gradu amaierako lana, han sortutako produktuek ingurumenean zuten inpaktuaren ingurukoa. Kooperatibako kideek aurrez ez zuten uste kutsatu egiten zutenik; emaitza bestelakoa izan zen, ordea: “Zikin batzuk zarete eta okerrena da ez zaretela konturatu ere egiten”. Hala ondorioztatu zuen ikasleak, Jordi Panyella Pol·len-eko kideak dioenez.
“Inprentan ingurumen-kudeaketarako sistema jarri genuen martxan, eragiten genituen kalteak aztertzeko. 2011n sortu genuen Pol·len, probatzeko zer egin genezakeen papereko argitalpenek ahalik eta gutxien kutsatzeko, eta 2015ean inprenta itxi egin genuen”. Pol·len-ek Europako diru-laguntza bat jaso zuen liburuaren bizi-zikloa ikertzeko, lehengaiak lortzen direnetik hasi eta liburua amaitu arte. Ondorioztatu zuten kalterik handiena lehengaiak erauztean sortzen dela, hain zuzen, %49,4; horren atzetik honako prozesuetan kutsatzen da gehien: inprentako xaflak sortzean (%17,6), banaketan (%16,4) eta diseinu fasean (%9,6).
Ikertzen hasi zirenetik paperean eta tintan egin dituzte aldaketa esanguratsuak
Datu horiek kontuan hartuta sortu zuten ingurumen-kalkulagailua 2012an, argitalpen batek aurrezten duen inpaktua kalkulatzeko. Paraleloki, Comanegra argitaletxeak llibre local zigilua ere sortu zuen, argitaletxeek adierazteko haien produktuak tokiko baliabideekin egin zituztela. Bi argitaletxeak elkartuta, 2022an Ekoedizioaren Institutua (Institut de l’Ecoedició) sortu zuten Katalunian, “liburu ekologikoaren aldeko esfortzuak bateratzeko asmoarekin”, Laia Figueres institutuko zuzendariaren arabera. Zerbitzu-kooperatiba bat da, batez ere argitalpenen sektoreari zuzendua. “Ikertzen jarraitzea da gure helburua, ekoedizioa bizirik dagoen kontzeptua delako”. Horrez gain, sektoreko eragileei errekurtsoak eskaintzen dizkiete enpresaren erabakietan ingurumen arloa kontuan har dezaten.
Ekoedizioaren irizpideak hamabi puntutan
Institutuak ekoedizioak bete beharko lituzkeen hamabi irizpide zehaztu zituen, liburuaren bizi-zikloaren azterketa oinarri hartuta: tokiko ekoizpena izatea; paper birziklatua edo FSC ziurtagiria duena erabiltzea; karbono-aztarna kalkulatzea eta emaitza komunikatzea; ekodiseinua erabiltzea; parte hartzen duten eragileek ingurumen-kudeaketa bermatzea; tintak aukeratzean ingurumen kalteak kontuan hartzea eta toner tinten arriskuaz jabetzea; inpresio egokiena aukeratzea, izan offset-a edo digitala; gailu elektronikoen ingurumen-inpaktua kontuan hartzea; inprentako xaflak, akaberak eta paketatzeak ondo aukeratzea; tiradak aztertzea; obra-lizentziak kontuan hartzea; eta, azkenik, energia-hornidura jasangarria erabiltzea.
Hamabi irizpide horietatik lehenengo hirurak betez gero, institutuak liburu ekoeditatuaren zigilua ematen du. Erabakia, ordea, ez du hartzen institutuak berak, hirugarren eragile batek baizik.
Institutuko zuzendaria lehen baldintzaren garrantziaz aritu zaigu: “Tokiko inprimatzea da lehen baldintza, azterketan ikusi baikenuen ingurumenean eragin handia duela produktua inprimatzen den lekuak eta haren ondorengo ibilbideak: banaketak, bidaiak… Horregatik, argitalpena banatzen den lekuan inprimatu behar da. Horrekin tokiko ekoizpenaren sarea ere babestu nahi genuen”.
Bigarren irizpidea paperari dagokiona da: paper birziklatua edo FSC papera erabili behar da. FSC-k Forest Stewardship Council esan nahi du (Basoko Nabigazio Kontseilua); irabazi-asmorik gabeko erakundea da, eta bere siglak daramatzan paperak ziurtatzen du produktu hori egiteko erabili den papera baso jasangarrietako zuhaitzetatik datorrela.
Hirugarren baldintza da argitalpen bakoitzak ingurumenean duen eragina adierazi behar duela produktuan bertan, irakurleak horren berri izan dezan. Honako bost datuak adierazten dira etiketan: karbono aztarna, sorturiko hondakina, eta uraren, energiaren eta lehengaien kontsumoak. Komunikazioari garrantzi handia ematen diote ekoedizioa ezagutarazten ari diren garai honetan. Pol·len-eko kideari garrantzitsua iruditzen zaio irakurleek argitaletxeen jarrerak ikuskatu ahal izatea. “Horregatik sortu genuen motxila ekologikoa; garrantzitsuena ez da zigilua bera, baizik eta irakurleak ingurumenean alfabetatzea”.
Kaltea aurreikusteko tresna
Horrez gain, zigiluko bost puntu horietan zenbat aurreztu den ere adierazten da, argitalpen estandar batekin alderatuta. Kalkulu hori ingurumen-kalkulagailuaren bitartez egiten da –artikuluaren hasieran aipatutakoa–. Kalkulagailua sortu zenetik eguneratu egin dute, eta aldagai gehiago sartu dizkiote. Ekoedizioaren Institutuarena da, eta bazkideei aukera ematen die argitalpen batek ingurumenean eragingo duen inpaktua kalkulatzeko, produktua egin aurretik. “Tresna horri esker, eragileek aukeratu dezakete kalterik txikiena eragingo duen diseinua. Esate baterako, paperaren neurriak”, dio Panyellak.
Ikertzen hasi zirenetik bi materialetan egin dituzte aldaketa esanguratsuak: paperean eta tintan. Gaur egun ekoeditatutako argitalpenetan erabiltzen duten paperak ez du klororik, eta tintei dagokienez, lehenago mineraletatik eratorritako tintak erabiltzen zituzten; orain, landare-jatorrikoak. Hala ere, argitaletxeko kidearen ustez ez dago tinta ekologikorik, ezta liburu ekologikorik ere. “Liburu ekologikoa ez da existitzen, beti izango du eragin negatiboa ingurumenean. Aitzitik, kulturalki eragin positiboa du, eta horregatik jarraitzen dugu liburuak egiten”.
Kataluniatik beste lurraldeetara
Gaur-gaurkoz institutuak 21 bazkide ditu (tartean ARGIA); gehienak Kataluniakoak dira, eta erakunde publikoekin ere ari dira elkarlanean, esate baterako Bartzelonako Diputazioarekin eta Enpresa Kulturalen Kataluniako Institutuarekin. “Hala ere, Kataluniatik kanpoko eragile askok jo dute gugana informazio eske”, zuzendariak baieztatu duenez. Epe ertainean argitaletxe eta inprenta gehiago batzea nahi lukete, “geroz eta argitalpen gehiagok izan dezaten ekoedizioaren zigilua eta, horrekin, geroz eta irakurle gehiago kontzientziatu daitezen”.
Sei liburu ekoeditatu ditu ARGIAk
Irailetik hona argitaratutako sei liburuak ekoeditatu egin ditu ARGIAk eta seirek daramate ekoedizioaren zigilua: Ilargia eta landareak agenda, Hausnarrean eta Planeta prekarioan argitaratu berriak eta Bizi baratzea, Sendabelarrek dakitena eta Etxeko landareak berrargitalpenak. Ibilbide baten hasiera izan da, baina ez da hutsetik abiatutako bidea. Liburuek eragiten duten aztarna ekologikoari buruzko kezka duela urte batzuetakoa da. Hain zuzen, Bizi Baratzea ildoko langileek duela zortzi urte aurkitu zuten interneten liburuen aztarna ekologikoa neurtzen zuen kalkulagailu bat. Aztarna ekologikoaren garrantziaz jabetuta, eta irakurleei begira gardentasun ariketa egiteko asmoz, hainbat urtez Ilargia eta landareak agendan aztarna ekologikoari buruzko oharra argitaratu zen. Halako batean, interneteko kalkulagailua ezin erabili gelditu zen ARGIA: pasahitza eskatzen zuen. Xerka aritu ondoren, kalkulagailuaren arduradunekin egin zuen topo ARGIAk, hain zuzen ere, Kataluniako Ekoedizioaren Institutuarekin.
Joan den abuztuan harremanak hasi, informazioa bildu eta institutuko bazkide egitea erabaki zuen ARGIAk. Bazkide egin eta ekoitzitako liburuek ekoedizioaren zigilua eramatea ez da paper bat betetzea. Erreportaje honetan azaltzen diren pausoak eman ditu ARGIAk. Ezinbestekoa izan da eta izango da hemendik aurrerako liburu guztietan Antza inprimategiarekin orpoz orpo lan egitea.
Ekoizpen bakoitzean, ARGIAri eta Antzari etxeko lanak egitea eskatzen die, baita ahalegin ekonomikoa ere.
ARGIAk liburu bakoitza argitaratu aurretik bi galdera hauei erantzuten die: Zein izango da liburu honen aztarna ekologikoa? Eta nola murriztu dezakegu? Aztarna gutxitu badaiteke, neurriak hartuko dira. Bistan da aztarna erabat ezin dela ezabatu, eta berebiziko garrantzia du kutsadura mailaren berri liburuaren erosleek izatea. Zigiluak betetzen du egiteko hori.
Hilabete gutxiko ibilbidea egin du ARGIAk. Bazkide egin berri eta sei liburu ekoeditatu ditu. Datozenetan ere, ariketa bera egingo du, zalantzarik gabe. Dagoeneko aldizkaria ekoeditatuta argitaratu dadin lanean ari da ARGIA.
Kapitalismoaren lekuan lekuko eta garaian garaiko egoerara moldatzeko gaitasuna harrigarria egiten zait batzuetan. Espero ez duzun tokian azaltzen dira antzekotasunak, eta hara non, bat-batean konturatzen zara munstroak Mallorcan hartzen duen itxura ez dagoela etxean bertan bizi... [+]
Pirinioetan dago ezpel basatien munduko eremurik handiena, eta hain zuzen Nafarroako Pirinioan, Abaurregainan, sortu zuten 2020an Ezpelzaintza 2050 egitasmoa. Cydalima perspectalis sitsa hondamendi handia eragiten ari da ezpeldietan azken urteotan, eta espeziea babesteko eta... [+]
Haurtzaroan, lursailen batean, parkeren batean edo baserri giroko lurretan sarritan izaten genituen “txitxareak” eskuartean… Jolas guneak gero eta artifizialagoak diren garai hauetan ordea, zaila da hiri nahiz herri-guneetan halakoak topatzea. Baina itsasoko... [+]
A ze pagotxa!, esan ohi dugu. Pagotxa edo mauka edo txokoa edo mantxunga edo… onturre edo probetxu ona ateratzen zaion zerbaiti edo horren aukerari esaten zaio “pagotxa”.
Epaiketetan aldeen arteko akordio aukera iritsi daiteke ahozko auzia hasi baino minutu batzuk lehenago. Auzi honetan akusatuek publiko egin dituzte orain arte egondako negoziazio saioak, eta azkena aste honetakoa izan da, ezagutarazi den moduan porrot egin duena. Akordiorik egon... [+]
Klima-aldaketari buruzko BC3 ikerketa-zentroak baieztatu duenez, Europako hiriak atzera geratzen ari dira klima-aldaketari egokitzeko neurrietan. Hain zuzen, nazioarteko beste zentro batzuekin batera egindako ikerketan frogatu dute egokitzapen klimatikoko planen ia % 70k ez... [+]
Hilabeteak dira jada fiskaltza, defentsa eta akusazio partikularra –Palacio de Arozteguia SM– epaiketa ez egiteko negoziatzen ari direla. Bazegoen oinarrizko akordio bat, baina Aroztegiko Elkartasun Komiteak prentsa ohar bidez iragarri du bertan behera gelditu dela.
Hemeretzi neurri ekologiko eta sozial barnebiltzen ditu, datorren urteko hauteskundeetako zerrendek ezarri ditzaten. Sei lan lerroren inguruan ardaztu ditu, eta herrien neurriaren arabera ezarri ahalko dira.
Energia politikek haserreak eta desadostasun sakonak sortu dituzte ekologisten artean. Ez da gauza berririk. Hemen eta atzerrian. Hemen eta orain, nabarmen. Duela bi urte, 2023ko udaberrian, gure ikerketa taldeak (ekopol.eus) hiru mahai-inguru antolatu zituen Donostian,... [+]
Zurea ez da ekologia, zurea ideologia da!”. Espainiako oposizio buruaren hitzak dituzue, oraingoan itzalaldia aitzakia hartuta. Zer den ideologia hitza desitxuratzea; trantsizio energetikoa edota energia politika, hitzak dioen moduan, politika hutsa delako. Kapitalismoaren... [+]
Iberiar penintsulan apirilaren 28an gertatutako itzalaldiak, egungo energia sistemak dituen arrakala guztiak utzi zituen bistan. Enpresa elektriko handien diru gosea, berriztagarrien ezarpen masiboak dakartzan ajeak, eta herritarrok bizimodu hiper-elektrifikatuarekiko dugun... [+]
Apirilaren 28ko gauean Bartzelonako Badal Ramblako terrazak gainezka zeuden; hoztu gabeko garagardoak zerbitzatzen ziren, baina jendeak zoriontsu zirudien. “Munduaren amaierak iritsi behar badu, pozik harrapa gaitzala”, esaten zidan auzokide batek. Hamar ordu baino... [+]
Ekopol ikerketa-taldeko Jon Iñaki Sasia Santos, Gorka Bueno Mendieta eta Iker Etxano Gandariasbeitia kideek Amalur EIS ingurumen-informazioko sistema aurkeztu dute. Egileek azaldu dutenez, sistema horrek ingurumen-inpaktuak kalkulatzen ditu, Kutsatzaileen Isuri eta... [+]