ARGIA.eus

2022ko ekainaren 27a

Euskaltzaleok behar genuen arnasa, hitzekin

  • Ez gaitu inork derrigortu elurpean, hotzez edota gauez korrika egitera. Inork derrigortzen ez gaituen bezala euskaraz egitera, euskaraz idaztera. Izatekotan, aurkakoa. Baina aukeratu egiten dugu, Korrikan parte hartzea bezala, euskaraz bizitzen saiatzea. Euskarak behar baititu euskaltzaleak, eta euskarak behar du, besteren artean, AEK, AEK-k Korrika behar duen gisa berean.

Getze, Nafarroako Elortzibar. (Argazkia: AEK)
Getze, Nafarroako Elortzibar. (Argazkia: AEK)
2022ko apirilaren 17a

22. Korrikak euskaltzaleoi azken boladan falta genuen indarra eman digu, Euskal Herri osoan. Kaleak betetzeko aukera eman digu. Arnastu dugu, azkenean, komunitateak ematen duen hatsa. Bizipoza.

Lekukoan gorderik joan den mezuan Karmele Jaiok azpimarratu du hizkuntza zerbait fisiko bihurtzeko ahalmena duela Korrikak. Hamaika egunez Korrikan ibili garenok ikusi dugu euskara gorpuztuta, milaka gorputzetan. Furgonetatik ikusi ditugu hamaika aurpegi, erdaraz edo euskaraz, euskarari bultzaka.

Furgonetaren barruan, ikusi dugu zer nolako lan izugarria egin duten hamaika lagunek, hamalau orduz jarraian, eta beste hamaikak hurrengo hamalau orduetan. Guztira 22 pertsonako taldea, 22 gorputz eta gogo, beti ekinean, beti elkarlanean. 22 euskaltzale horiek izan dira 22. Korrikaren motorra. 22 lagun horiei eta haien bizkarra zaintzen aritu direnei esker iritsi da lekukoa Amurriotik Donostiara, 2.000 kilometrotik gora eginda. Lagun horiek izan dira herriz herri hainbesteko zoriontasuna transmititzearen arduradun zuzenenak.

Komunikazio taldeko beste hamaika pertsonak jarraitu dugu egunerokoa, eta euskarazko hedabideetan kontatu dugu egunez egun barruan eta kanpoan ikusi duguna. Kontatu dugu milioi bat pertsona inguru mugitu dituela Korrikak, kontatu dugu nolako harrera egin zaion herri ekimen honi, kontatu dugu nola hunkitu den jendea. Eta badakigu, gu hunkitzen ginen bezala hunkitu direla ibilbidea telesail bat balitz bezala egunez egun etxetik jarraitu duten lagun asko. Behin Korrika amaitutakoan telebistan zer jarri ez zekiela geratu dela asko. Diotenez, inoizko Korrikarik segituena izan da aurtengoa.

Hala ere, furgonetan joan garenok ez dugu dena kontatu. Ez dugu aipatu zenbat erdara entzun dugun herririk euskaldunenetan ere; ez dugu erakutsi zer euskara gutxi entzun dugun herririk erdaldunenetan; ez dugu kontatu batzuei Korrikak zenbateko  deserosotasuna eragin dien, euskararekiko duten gorrotoa; ez dugu dena jarri mahaiaren gainean, zaila baita zenbait gauza hitzekin azaltzea.

Dena den, Korrika hori baino gehiago da. Herri baten aurpegirik onena, ziurrenik. Auzoz auzo, herriz herri, Euskal Herria euskalduntzeko lanean ari direnentzat aukera ezin hobea, festa giroan, inguruetan eragiteko. Lasterketa herrietara iritsi aurretik bai pasatakoan ere Korrikak irauten du, izan Korrika Txikien eta Korrika kulturalen bidez, bolondres eta militantziaz, hamaika ekimen antolatzen ditu jendeak. Euskaldunak ahalduntzeko hondar aleak.

Hitzekin zen aurtengo leloa. Hitzetatik ekintzetara egitera jauzi egiteko deia. ARGIAren webgunean hala egin duten zenbait pertsonaren bizipenak ezagutzeko aukera izan dugu. Euskara ez baita zaila, nahia baizik, Jaiok gogoratu duenez. Herritarrak mugiarazi ditu AEK-k, eta barruak mugiarazi ditu Korrikak berriro ere. “Bateriak kargatzeko balio dezala”, nabarmendu digu euskaltzale batek Maulen jende gazte mordoa korrika ikusi ostean. “Baina bateria horiek deskargatu daitezela datozen bi urtetan, erabili egin behar ditugulako”, gaineratu du.

Ez dakigu Euskal Herriak oroituko duen 22. Korrika pandemia baten osteko berpizte gisa, bultzada erraldoi eta indartsu gisa. Baina hala izan da. 22. Korrikako pertsonak, aurpegiak, sentipenak eta kantuak iraun dezatela luzaroan, herri ekimena apal izan den aro baten amaiera gisa. Eta ez ahaztu, beti dagoela norbait Hitz Ekiteko prest...

Amurrio.
Etxebarri.
Izoria, Aiara.
Munarriztik Genbera bidean, Nafarroa Lizarraldea.
Anotzetik Azanzarako bidean. 
Donibane Garazi.
Baigorritik Erratzura bidean, Baztan.
Arabako Lautada eta Sakana artean.
Gizaburuaga.
Arguedastik Valtierrarako bidean, Erribera.
Donapaleu.
Lizarraldea.
Erandio.
Arguedas, Erribera.
Maule.
Loiu.
Derediatik Zuhatzu Donemiliagara.
Bilbo.
Donostia.

 

Kanal honetan artxibatua: Korrika

Korrika kanaletik interesatuko zaizu...
2022-05-19 | Leire Artola Arin
Gaur hasiko da Bretainiako Korrika Ar Redadeg

Maiatzaren 20an hasita, 2.022 kilometro egingo dituzte Bretainian, Gwitreg herritik Gwened herriraino. Oarsoaldeako AEK-k antolatuta, ordezkaritza bat joango da hara atxikimendua ematera.


2022-04-11 | ARGIA
Korrikako mezua, Karmele Jaioren eskutik

Jarraian irakurgai Karmele Jaiok idatzi duen eta lekukoan sartuta, Euskal Herri osoan barrena, milaka euskaltzaleren eskuetatik pasa den mezua.


2022-04-11 | Leire Artola Arin
Hitzetatik Ekintzetara (eta VI)
Abokatu euskaldunak: Desobedientzia, euskara ez dadin epaitegietan hizkuntza arrotza izan

1990eko hamarkadaren amaieran borroka sutsua egin zuten epaitegietan abokatu euskaldunek. Euskarari beste hizkuntzen balio bera eman eta Justizia euskalduntzeko saiakera egin zuten, hala nola materiala prestatuz eta epaiketetan euskara hutsean jardunez. Garesti ordaindu zuten,... [+]


2022-04-10 | ARGIA
Donostiako kaleetan barrena dabil Korrika, edizio gogoangarriari amaiera emateko prest

Amurrion martxoaren 31n hasi da Korrikaren 22. edizioa, eta hemen jarraipen berezia egiten ari gara, apirilaren 10era arte. Egunez egun eta herriz herri gertatzen denaren berri emango dugu, eta irudi ikusgarrienak eskainiko ditugu, euskararen aldeko ekimen jendetsu eta... [+]


Irakurrienak
ASTEKARIA
2022ko apirilaren 17a
Azken albisteak
Argia buletina
Egunaren laburpena
zure e-postan
Eguneraketa berriak daude