Bizi egun bat ARGIAren baloreetan

  • Jasangarritasuna, parekidetasuna, lurraldetasuna, euskaltzaletasuna eta parte-hartzea. Bost balio horiek hartu ditugu kontuan egitaraua adosterakoan, oholtzaratuko diren izenak bilatzerakoan, zerbitzatuko ditugun elikagaiak hautatzerakoan...Hona irailaren 27an Usurbilen gozatu ahalko duzuna.

Zangozako Oinez Basoan hazi eta buztinez eginiko bolak botatzen. Argia Egunean Nendo Dango tailerrean egingo ditugunak ere Oinez Basoa biziberritzeko erabiliko dira.
Zangozako Oinez Basoan hazi eta buztinez eginiko bolak botatzen. Argia Egunean Nendo Dango tailerrean egingo ditugunak ere Oinez Basoa biziberritzeko erabiliko dira.

10:00etan emango diogu hasiera egunari, eta 1998tik gure proiektua laguntzen diharduen Usurbilgo Argiaren Lagunak taldeari omenaldi xumea egingo diogu –burutu izan dituen ekintzen artean, agian ezaguna egingo zaizu urtero abenduan Usurbilen antolatzen duen Pirritx eta Porrotx pailazoen emanaldia–. Goiz osoan zehar izango duzue aukera jolasen txokoan aritzeko, Argia proiektua gertuagotik ezagutzeko, Hernaniko fanfarrearekin saltoka aritzeko, Argiako txosnan tragoa eta mokadua egiteko...

Ordubeteko txango gidatua Jakoba Errekondo, Josu Tellabide eta Jon Ander Galarragarekin

Adin eta ezaugarri guztietako pertsonek egiteko moduko ibilbidea prestatu digute luxuzko hiru gidek: Josu Tellabidek Usurbilgo baserrien liburu mardula osatua du eta ibilbidea azalpen historiko eta etnografikoz jantziko du. Argian urte askoan landaredia aztergai duen Errekondok azalduko digu geldialdi bakoitzeko paisaia kulturala. Eta Argiaren webgunean Konpostazank! bloga duen Jon Ander Galarragak auzokonposta gunea baliatuko du konposta egiteko irizpideak azaldu eta konpostagailu barruko faunaren behaketa zuzenean egiteko.

10:15ean plazatik abiatuko da ordubeteko ibilaldia eta Usurbilgo herriaren sorrerara bidaiatuko dugu, egun Kalezar deitzen zaion auzo hori izan zela Usurbil hiribildua oroituz. Ez galdu aukera paisaiaren ikuspegiaz gozatzeko, eguna pasako duzun inguruaz ikasteko eta hiru adituei zuzenean kontsultak egiteko.

Hazi bolak euskara eta lurra biziberritzeko

Zangozako ikastolarekin eta Zestoako Katamarroa natur taldearekin elkarlanean, hazi eta buztinezko bolak (Nendo Dango) egingo ditugu 11:30ean hasita (informazio osoa Pello Zubiriaren Xehe blogean). Era berean aukera izango dugu Oinez Basoa proiektua ezagutzeko, eta euskararen eta lurraren alde gure hazia jartzeko. Egingo ditugun hazi boletako batzuek Zangozako Oinez Basoan jaurtiko ditugu, beste egun batean. Beste Nendo Dango batzuek, berriz, Zubietan errauskailua egiteko urratu zuten lur saila biziberrituko dute. Eta norberaren esku bere etxe ingururako Nendo Dango batzuk egitea.

Argiazaleon Topaketa

12:00etan frontoian dugu zita, Argiazale. Harpidedunak, laguntzaileak, irakurleak, kolaboratzaileak, langileak... ezagutzeko eta elkarrekin norabidea irudikatzeko gune izango da Argiazaleon Topaketa.

Hasteko eta labur, hitzez, irudiz eta ziriz azalduko ditugu Argiaren ezaugarriak: komunikazio proiektua, berau egiten duen lantaldea eta harpidedun-laguntzaile komunitatea.

Jarraian, talde txikitan bilduta tartea hartuko dugu norberak bere proposamenak, iritziak, bizipenak botatzeko eta noski, besterenak jaso eta ikuspegia aberasteko. Hona landuko ditugun hiru galderak: Zein da Argiarekin duzun harremana eta nolakoa izatea gurako zenuke? Zeintzuk dira zure gustuko gai edo sailak, eta zeintzuk egotea gurako zenuke? Herriz herri eta eskualdez eskualde, Argiako bide-lagunekin dinamika ezberdinak abiaraztea dugu xede. Zer egingo zenuke zure herrian Argia bera eta bere balioak zabaltzeko?

Topaketa ixteko ideia guztiak bateratuko ditugu, eta umorez ere aterako diogu Argiazaleon Topaketari argazkia. Aurrera egiteko batzea eta ikuspegiak elkartzea bezalakorik ez dago. Zatoz eta parte hartu!

NAN jaurtiketa eta bola joko zirikatzailea

Bazkalostea, Katalunian herriz herri zabaltzen doan NAN jaurtiketa txapelketa egingo dugu: nork hurrunago bidali Frantziako, Espainiako (zein gainerako estatuetako) agiriak. Eskuz botatzea da araua, eta hasi entrenatzen, errekorra Gironako Bescanó herrian asturiar batek jarri berri baitu abuztuan: 38 metrora bidali zuen, alajaina! (bideoa ikusgai Argiaren Barrenak blogean). Bigarrenik, bola-jokoan aukeran izango duzu zer erakunde, kontzeptu eta pertsona jarri jopuntuan. Herri kirol hauek ikustekoak izango dira, Unai Brearen zuzeneko erretransmisioarekin.

Bertso saio koloretsua

Kategoriko bertsolari izateaz gain ARGIAko kazetari sinadura indartsuak ere badira Amets Arzallus, Sustrai Colina eta Uxue Alberdi. Plazetan entzuleak eurenganatzeaz gain, Argiako bertso irakurleentzat jartzaile finak dira Julio Soto eta Miren Amuriza. Eta askorentzat Bertso Eguneko errebelazioa izan zen Rosi Lazkanok gogoan du umetan Zeruko Argiatik ikasten zituela bertso sortak. Sei bertsolariek kartel koloretsua osatzen dute belaunaldiz, lurraldetasunez, euskalkiz, bertsokeraz, generoz... Gaiak Argiako erredakzioan ondu eta Urko Apaolazak aurkeztuko ditu. Ez da ohiko saioekiko berezitasunik faltako...

Bertsolarien prestutasunari esker eta entzuleen sarrerako ekarpenarekin (5 euro, bertan salgai) Argia proiektua indartuko du bertso saioak.

Andrabanda eta kontzertuak

19:30ean Ondarroako emakume koadrilak osatutako Andrabanda perkusio taldeak astinduko ditu kaleak. 22:00etatik aurrera, aldiz, ahotsak hartuko du plaza: Behi Bi Blues osatzen duten Gaizka Azkarate eta Azkaiter Pelox bikoteak 50eko hamarkadako blues abestiak euskaraz eskainiko dizkigute. Eñaut Elorrietak Deserriko kantak diskoan ekindako bakarkako bidea urratzen jarraituko du. Perlak laukoteak –postpunk hitzarekin definitzen dute euren estiloa– zuzeneko kontzertu indartsua eskainiko duela ziur gaude. Eta ez bukatzeko, Esther Sound Sister DJak funky musika nahastuz ordu txikiak arte girotuko du plaza.

Bazkari herrikoi umoretsua: Erabat Euskal Herriko eta garaiko produktuekin egina

Sarrerakoak
- Hiru tomateko entsalada, pesto eran: Tuterako,Aretxabaletako eta Hernaniko uzta.
- “Basatxerri” patea Ezpeletako piperraz.
- Ibarrako piperrak.

Lehen platera
- Arguedasko arroz ekologikoa garaiko barazki ekologikoekin.

Bigarren platera
- “Lumagorri” oilasko gisatua, Arabako patata eta garaiko barazki ekologikoekin.

Azken burukoak
- “Idiazabal” gazta, naturala eta ketua.
- Baserriko izozkia.

Kafea

Edateko
- Lezaun upategiko “Egiarte” ardo beltz ekologikoa
- Lezaun upategiko “Egiarte” ardo gorri ekologikoa.
- Sagardoa txotxetik.

Prezioa: 15 euro
Ekoizleek eta bazkaria prestatuko duen Lurlan kooperatibak egindako ekarpenari esker, menu eder hau 15 euroan dastatu ahalko duzu.

Ordua: 14:00etan, Askatasuna plazan.

Kafean, Asisko eta Kike Amonarrizen ttantta
Astero ziri bat ekartzen diguten Kike Amonarriz eta Asisko Urmenetak zerbait darabilte buruan: fina, laburra, ideien eragilea... irria bezalakoa.

Leku mugatuak: Egin erreserba lehenbailehen
Bazkariko txartelak erreserbatzeko deitu Argiara: 943 37 15 45 edo idatzi bzuza@argia.eus helbidera. Beste leku hauetan ere eskura ditzakezu: Argiako egoitzan (Lasarte-Orian); Usurbilgo Bordatxo tabernan, Hernaniko Oinddi eta Txilin eta Iruñeko Karrikirin.


ASTEKARIA
2014ko irailaren 21a
Irakurrienak
Matomo erabiliz
Azoka
Kanal honetatik interesatuko zaizu: Nendo Dango
2015-02-01 | Estitxu Eizagirre
Zabortegi bat berreskuratzeko modu onena

Zangozan landatutako 1.000 horiekin, dagoeneko 20.000 zuhaitz inguru dituzte Nafarroako ikastolen Oinez Basoek. Argia Egunean (Usurbilen iazko irailean) eginiko hazi eta buztin bolak izan ziren zabortegiko lurrak berreskuratzeko argiazaleon ekarpena.


2015-01-14 | Estitxu Eizagirre
Larunbatean 1.000 zuhaitz landatuko dituzte Zangozako Oinez Basoan

Nafarroako Ikastolen Elkarteak eta bertako ikastolak antolaturik, Zangozako zabortegi zaharreko lurra berreskuratuko du basoak, “La Celada” deituriko parajean. Bertan jaurtiko ditugu Argia Egunean haziz eta buztinez eginiko nendo-dango bolaxkak ere.


Hasi Nendo Dango atelierrerako haziak biltzen

Nendo Dango tailerra dago antolatuta, beste hainbat ekitaldiren artean, irailaren 27ko ARGIA Egunerako Usurbilen. Teknikaren zehaztapenak “Hazitik hasita mundua oihantzeko” kronikan azalduta daudenez, hona laburpena.


2014-07-27
ARGIA Eguna irailaren 27an Usurbilen
ARGIA ezagutzeko festa, oso gure erakoa

Euskaltzaleak, ARGIAko irakurleak, langileak, kolaboratzaileak, harpidedunak, blogariak, sare sozialetako jarraitzaileak... azken finean, ARGIAren inguruan batzen garen komunitatea elkar ezagutu eta egun eder bat pasatzeko aukera emango digu aurten berreskuratuko dugun ARGIA... [+]


Eguneraketa berriak daude