ARGIA.eus

2020ko abuztuaren 07a

Erromantikoak

  • Euskadiko Orkestra Sinfonikoa
     

    Zuzendaria: John Axelrod.
    Bakarlaria: Alexandre Da Costa (biolina).
    Egitaraua: Txaikovski eta Schumann-en obrak.
    Lekua: Bilboko Euskalduna Jauregia.
    Data: Apirilaren 30a.
     

Montserrat Auzmendi del Solar
2014ko maiatzaren 25a
Euskadiko Orkestra Sinfonikok saio erromantikoa eskaini zuen Bilboko Euskalduna Jauregian, apirilaren 30ean.
Euskadiko Orkestra Sinfonikok saio erromantikoa eskaini zuen Bilboko Euskalduna Jauregian, apirilaren 30ean.

Saio erromantikoa proposatu digu Euskadiko Orkestra Sinfonikoak edizio honetako 10. abonu kontzerturako. Txaikovskik eta Schumann-ek, hain desberdinak sentimenduak azaleratzeko erabiltzen dituzten bideak aukeratzerakoan, ordubeteko saio disfrutagarria eman ziguten. Hori biribiltzeko, izartxoa den Alexandre Da Costa biolin jotzaile kanadarra (azkenaldi honetan hemen sarritan entzuten duguna) eta John Axelrod zuzendari bitxia izan genituen taula gainean. Dibertigarria.

Zein ederra den Txaikovskiren Biolin eta Orkestrarako re maiorreko kontzertua, op. 35. Lehenengo mugimendu maiestatetsua, dotorea, publikoaren begikoetako bat da, eta ez da harritzekoa. Konpositorearen irudimen melodiatsua modu apartaz agertzen da lan honetan. Melodiak kateatu egiten dira bata bestearekin, doinu-orgia bat eginez. Nahiz eta forma aldetik bitxikeriak eduki, erraz eta gustuz entzuten da. Aldi honetan, gainera, bertsio aipagarria izan genuen, ez dakit nahita edo nahi gabe, baina kontraste harrigarria sumatu genuen bakarlariaren eta zuzendariaren ikuspegien artean. Axelrodek partituraren “ertzak” azpimarratu zituen, irakurketa nolabait gogorra eta erritmikoa eginez. Da Costak, aldiz, melodia gozo eta bigunak marraztu zituen. Agian “hozkada” gehiago espero edo nahi genuen, baina, tira, kontraste interesgarria suertatu zen, ezohikoa. Hori bai, Da Costa birtuoso akatsgabea da, estilo guztiak menderatzen dituena. Halaxe frogatu zuen bisetan, non mundu klasikotik rockaren estetikara pasa zen arazorik gabe.

Erromantizismoaren beste aurpegi bat dastatu genuen saioaren bigarren zatian. Schumann-en mundu estetikoak ez dauka zerikusirik beste erromantikoekin. Haren musika eta literatura beti oso lotuta ibili dira. Pianorako obrek, adibidez, askotan, erreferentzia literarioak dituzte, konplexutasun intelektual berezia emanez musikari. Haren 4. Sinfonia, re minorrekoa, op. 120, ez da garai hartako sinfonia estandar bat. Hasteko, lau mugimendu ditu, gainera elkarloturikoak, eta itxura programatikoa du, imajinatiboa. John Axelrod zuzendari estatubatuarrak obraren irakurketa dinamikoa egin zuen, bere estilo pizgarri eta biziarekin.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Disko kritikak

Disko kritikak kanaletik interesatuko zaizu...

ASTEKARIA
2014ko maiatzaren 25a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude