Bilboko Aste Nagusian bi estreinaldi, Pabellon 6 aretoan


Myriam Garzia
2013ko uztailaren 28a

Bertan ekoitzitako bi lan estreinatuko ditu Bilboko Pabellon 6 aretoak Aste Nagusian. Hoy, Última Función antzezlana dugu bat, Karrakaren taldearen aspaldiko lana, Ramon Bareak eta Itziar Lazkanok antzeztua.

90eko hamarkadan ekin zion bideari Karraka taldeak. Arriaga Antzokian izan zen, eta aipatu lan hau taularatu zuten, hain zuzen. Halaber, Ramon Barea eta Itziar Lazkano izan ziren protagonistak. 20 urte geroago, La Galleta del Norte literatur tailerrak Karrakaren laguntzaz idatzitako lana berriz eskaintzeak “bereziki ilusionatu ditu antzezle biak”, Irene Bau Pabellon 6ko kide eta antzezleak aipatu digunez. Bi aktore zaharren istorioa kontatzen digu obrak. Bikotea bizitza errealean, balizko azken emanaldia antzeztuko dute, eta hainbat pertsonaia agertuko dira: Godot, Ionesco, Juan Tenorio, Stanislavsky... Beraiekin hitz egingo dute, galderak egingo dizkiete, epaitu egingo dituzte, azken emanaldi handia hasi baino lehen. Abuztuaren 15etik aurrera ikusi ahal izango da, gaueko bederatzietan, Pabellon 6 aretoan.

Bilboko Aste Nagusiko bigarren estreinaldia Chihuahua kabareta dugu. Zortzi antzezle biltzen ditu lan honek: Mitxel Santamarina, Enriqueta Vega, Lander Otaola, Itxaso Quintana, Iñaki Maruri, Quique Gago, Diego Perez eta Irene Bau. Felipe Lozak idatzi eta zuzendua da kabareta, eta antzezleek dantzan egin, abestu eta hainbat pertsonaia ezagun imitatuko dituzte. Besteak beste, Liza Minelly, Marilyn Monroe, Amy Winehouse, Cantiflas eta Sabino Arana. Mexikar giroko gau alaien lokala da Chihuahua kabareta, baina krisiak ere gogor jo ditu bertako biztanleak: publikoa eskasa da, BEZ zergak dena garestitu du, EEE bat egitea beharrezkoa da, Frida Khalo eta Monserrat Caballe langabetuen hileran daude. Irene Bauk azaldu digunez, “kabareta bizitza bera bezalakoa da. Komedia musikal honek errepaso ironikoa egingo dio azken hamarkadako egoerari. Gure garapenari egingo diogu barre, kontsumo alaitik krisi latzera emandako jauziari”.

Aste Nagusiarekin batera, arte eszenikoetako sortzaile eta antzezleek kudeatutako Pabellon 6 aretoak bi urte beteko ditu.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Gomendioak  |  Antzerkia  |  Bilbo

Gomendioak kanaletik interesatuko zaizu...
2017-08-04 | Axier Lopez
Historia ofizialetik kanpo

Desobedientzia zibil ez-biolentoa aipatuz gero, Mahatma Gandhi aurkeztuko digute ikur nagusitzat, Indiako kolonialismo gerrazale ingelesaren parte eta sustatzaile, Mussoliniren aldeko edo orduko Etiopia eta Abisiniako sarraskien justifikatzaile aritu bazen ere.


ASTEKARIA
Azkenak
EGILEA
Eguneraketa berriak daude