Ekintzetan ekintza


Garbine Ubeda Goikoetxea @garbineubeda
2013ko urtarrilaren 13a

Tolosako Bonberenea ez da edozein gaztetxe. Beste molde batekoa da. Ez du mota honetako guneari orokorki lotzen zaizkion zenbait ezaugarri eta funtzionamendua ere apartekoa du. Berezitasunak berezitasun, hamabost urte bete ditu, hamabost urte oparo. Asmoz, proiektuz, kontzertuz, ekitaldiz, ikastaroz eta forma guztietako ekintzez jositako ibilbide luzea, altruismoz indartua.

Batzuek ahalegin handirik gabe gogoratuko dute mendea hastearekin batera ‘Bonbero’ra –hala deitzen diote gehientsuenek suhiltzaileen egoitza izan zenari–,  “instituzioen manipulazioetatik kanpoko gazteentzako espazio autogestionatu eta independentera” heldu aurreko saioak. 1997tik hasita, bizpahiru eraikin okupatu ziren hau baino lehenago, artean euskaltegi zaharra, gaur egun Topic nazioarteko txotxongilo zentroaren egoitza. Ez zuten inon luze iraun.

Aitzindari izandako saio horiek kontuan hartuta, hamabost urte bete ditu Bonbereneak, eta bost gutxiago, hamar, Bonberenea Ekintzak plataformak. Aitzakia ezin biribilagoa da denboran pausatxoa egin eta orain arte burututakoari errepasoa emateko, bilana jendartean partekatzeko. Horren isla dugu 2002-2012 Doinuen Hamarkada, bina CD eta DVDz lagunduta datorren multimedia liburua.

Bonberenea Ekintzak ez da kontzertuetarako plataforma hutsa, baina horixe du, zehatz izate aldera, urte osoko jardunik zainduena. Mila kontzertutik gora antolatu dituzte elkartu zirenetik gaurdaino –mila zati hamar, atera kontuak urtean zenbat diren–, eta ikus-entzunezko historia aberats hori dugu argitalpenak ondoen ispilatzen duena.  “Elur bola txiki zena bolatzar bilakatu da”, dio liburuak hitzaurrean, urteen joanean lortu den potentziala eta erreferentzialtasuna adierazteko. Kontzertu mordo horri esker biltzen dute, bestalde, autogestiorako behar izaten dituzten sosak.

Juantxo Arakama Bonbereneako ekintzaile eta musikariaren hitzak baliatuta, CDak, DVDak eta tapaki gogorreko liburua sortan eskaintzen dituen lan hau asmo “entziklopedikoz” jaio zen, ibilbide osoan egindako guztia xehe-xehe biltzen ahalegindu delako. Besteak beste, lekuko filosofia laburbiltzen duten idatziak, kontzertuen kronologia, beren zigilupean argitaratuetako diskoetako abesti bana (guztira 38), bertatik pasatu diren taldeen bideo-klipak, grabazioak, zuzeneko 13 emanaldi, argazkiak, Karlos Osinaga Txapi Bonbereneako ekintzaile, musikari eta ekoizleari elkarrizketa…

Bertan aurkituko ditugun taldeak zerrendatzea aski genuke, multimedia lan honek, Tolosaldeak eman dezakeenaz harago, Euskal Herriko musikaren testigantza grafikoa ere badela jabetzeko: Lisabö, Willis Drummond, We are Standard, Napoka Hiria, Humilitate, Deabruak Teilatuetan, Glaukoma, Kuraia, Petti, Eraso, Anestesia, Izaera, Estricalla, Berri Txarrak, Zea Mays, Ama Say, Inoren Ero Ni, Desordutan, Lif...

Arazo bakarra zabalpena du. Tamalez, ez dago nonahi aurkitzerik.

Bonberenea ekintzak 2002-2012, doinuen hamarkada

Argitaratzailea: Bonberenea (Tolosa)

Formatua: 2 CD + 2 DVD + tapaki gogorreko liburua.

Salneurria: 20 euro

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Musika  |  Gazte mugimendua

Musika kanaletik interesatuko zaizu...
ASTEKARIA
Azkenak
EGILEA
Eguneraketa berriak daude