Galdetzeari jarriak

I
Eskubideak berdinak izan
behar badute jaiotzez,
elkar lagundu behar badugu
borondatetsu, bihotzez.
Parean bizi behar badugu
nagusitzeko asmoz ez;
gauzak banatu behar badira
nire, zure, haren sosez.
Zergatik hiltzen dira urtero
hamar milioi ume gosez?

IV
Hitzak badira jakinduria
gabe gutxi ginateke.
Beraz hitz asko jakinez gero
osatuago geundeke.
Hitzak badira kultura bizi
lurralde baten aterpe;
kultura bada aberastasun
urre-gorri, urre-bete.
Hizkuntza bat hil nahi izatea
nola ulertu daiteke?
 

II
Zu ez bazaitut, ezin ninteke
zorionera iritsi.
Ni ez banauzu, ezin dituzu
gauean begiak itxi.
Nik izugarri maite zaitut zu
zu lora, zu harribitxi;
zuk izugarri maite nauzu ni
ni gehien, ni lehenbizi.
Eta orduan zergatik ezin
gara elkarrekin bizi?

V
Ikasi duzu nola moldatu
ordenagailu parean.
Zer den Facebook-a, zer den
 iPad-a hacker izaten sarean.
Baina apustu egingo nuke
duzun abilidadean;
zaudela ardi batek zenbat hortz
dituen jakin gabean.
Eta bai, noski! Ahoan dauzka!
Baina goian ala behean?
 

III
Langabezia gora badoa
honi zizta, hari zizta.
Soldatak behera baldin badoaz
lehen gutxi, orain pixka.
Uzten badira osasungintza
kultura, hezkuntza erdizka;
dagoen zorrak beldurra ere
ematen badu aldizka.
Zergatik ez da zalantzan jartzen
sistema kapitalista?

VI
Inozentzian bizi direnak
nahiz kontentu diruditen.
Bat herdoiltzen da lepo gainari
ez badio eragiten.
Asko dakiten horiek ere
nola dena ez dakiten;
kezkarik izan ezean nola
zaila den gauzak jakiten.
Erantzunik ez aurkitu arren
segi galderak egiten.
 


Doinua:  Lurraren pean sar nindaiteke


Bidali zure sortak bertsoak@argia.eus helbidera. Aukeratuak orri honetan argitaratuko ditugu.


Kanal honetatik interesatuko zaizu: Argiako Bertso jarriak
2023-01-10 | Imanol Lazkano
Bertso berriak, txapelketako finalari jarriak

Abenduaren 18an, Euskal Herriko Bertsolari Txapelketako finaletik bueltan jarritako bertsoak.


2019-03-01 | Miren Osa Galdona
Zeruko Argia eta ARGIAko bertso jarriak
Xanti Zabala “Lexo”ren emaria

Xanti Zabalari omenaldia martxoaren 16an
Bertso idatziei ahotsa emateko garaia

2014-01-16 | Imanol Lazkano
Basarriren mendeurrenean
Doinua: Ari naizela

 

Bertsolaritza zeraman bere
bihotz eta bekokian
berrikuntza bat behar zuela
ere berak bazekian.
Ostatuetan jaio zen hura
txertatuaz antzokian
urrats berririk eman ez balitz
norabide... [+]

Eguneraketa berriak daude