Bertso berriak... Aiako saltsari jarriak

2006ko azaroaren 05an

Larunbata zen ilunabarra
irailak hamaseiean
behorrak eta zaldiak proba
jokua zeukaten Aian.
Ikusmin latza sortu zuen hark
Gipuzkoa eta Bizkaian:
milatik gora jende dexente
huraxe ikusi nahian...
Norgehiagoka behar zuena
bukatu zuten ezbaian.

Plaza garbitze nahiz pisaketa
hura bazen ikusmina!
Ordu pare bat aurreraturik
jendeak egonezina.
Denok batera sartu nahiean
banaka behar zen baina,
asko kezkati ea lekua
bazen denentzat adina,
ikusi gabe inork etzuen
buelta hartu nahi jakina.

III

Galtzadari eta bere giroaz
hizketan ari ginela
proba harriari ehun kilo bota
eta kulunkan bezela,
esan genuen balantza hura
oso normala etzela.
Noizbait erantsi eta abiatu
zenean Bizkaiko Perla
hirurogeita lau ordu erdiz
eta tartean ustela!

«Ondu baietza» artekariek
beste askok «gatxa dauka!»
baina halere Lanbru hasi zen
ia erlojuaren aurka:
ordu erdia betetzerako
jada ondu zuen marka,
ezetz jokatu zutenak triste
baietz jokatuak mauka!
eta besteok galdezka zeinek
egin ote zuen tranpa.

Perla galtzaile Lanbro irabazle
amaitu zen bien txanda
ikusle eta animaliak
batzuek plazatik joanda,
beste batzuek harria plazan
azpikoz gain buelta emanda:
horra argitu lehengo zalantza
harria azpia janda!
Hori horrela egin duena
nongo satorra izan da?

Herri kirolak kultura omen
aritzen dira esaten,
horrela bada egun horretan
etxean ahaztuko zuten!
Halere segi bi aldetakoek
han bildutakoa jaten
baina ez kexatu gero ez bada
inoiz ikuslerik joaten...
Ez berriz ere ez badigute
ejenplu hoberik ematen.