Emakumeak borrokan
Uxue Alberdi Estibaritz
2010ko martxoaren 21a

I
Ez da berdina lurrikararen
osteko isiltasuna
edo begiez itsasoari
lapurtu nahi dioguna.
Isilak dira kalabozoa
eta hegan doan luma,
hiltzailearen azken keinua,
agureen maitasuna...
Horren izan daiteke arina,
edo hain harri astuna!
Gorde ta gorde sabel barruan
bolbora eta beruna...
Beldurra bada ahoa itxi
eta zabaltzen diguna
esan gabeak esan dezake
esateko daukaguna.
II
Gerra-ostea. Baserri zahar bat.
Sukalde soila ta hitsa.
Irrati batek amenazuak
hara-hona darabiltza.
Isiltasuna erein zutenek
kendu zietenez hitza,
umetokiak beldurrez betez
mutu jaio zen bizitza.
Amorruaren seme-alabok
ez galdetzea baldintza,
tortura bada ahoa itxi
ta zabaltzen duen giltza...
Gero urteak, minak, gorpuak,
kartzela eta sasitza,
eta oraindik esanezinei
jaten ematen gabiltza.
III
Eztei-eguna bilduz marko bat
mesanotxean luzaro
zahartu dena, horitu dena
urtez urte, aroz aro.
Esandakoak asko dira ta
esan gabeak gehiago:
ezpainak josi, muxu bihurtu
eta etapak igaro.
Sofa gorrian eseri eta
sentitzen dira arraro,
isiltasuna bete nahiean
mila eta bat berbaro.
Baina edozer betetzekotan
hustu_egin behar lehenago:
eraztunaren erdigunea
hutsik ta isilik dago.
IV
Ohe zabal bat. Bi gorputz etzan.
Maindire artean hiru.
Desioaren labirintoan
minotauroa testigu.
Pentsamendu bat ihesi joan da
fantasiaren gatibu,
hainbeste aldiz isildu eta
irreala irudi du.
Gure amorru eta desiren
kartzelero dirudigu!
Disimulatu ustean baina
denak ikusten zaizkigu.
Kontzientziari ziria sartzen
saiatu arren beti gu
esan gabeak ere entzuten
dizkigula badakigu.
V
Bozka kutxa bat garden-gardena
ezin transparenteago:
askatasunen sehaska edo
iritzien sarkofago?
Lehen atzamar diktadore bat
ta orain, berriz, akabo!,
bostekoaren atzean bost hatz
ezin diktadoreago.
Demokrazia, demokrazia
zurekin haserre nago!
Aske naizela diozu baina
ez al naiz zure esklabo?
Demokraziak badauka hatz bat:
gure ezpainetan dago.
Ta iritzia ematen dugu
gero eta baxuago.
VI

Doinua: Martxa baten lehen notak.

Bidali zure sortak bertsoak@argia.eus helbidera. Aukeratuak orri honetan argitaratuko ditugu.
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Argiako Bertso jarriak

Argiako Bertso jarriak kanaletik interesatuko zaizu...
ASTEKARIA
Azkenak
EGILEA
Eguneraketa berriak daude