I
Etxekoandre bik lehengo hileko
patioan, goiz batean,
loreak ureztatzen zituzten
berba egin bitartean:

II
PSE: Egunon, Pilar. PP: Kaixo, Paloma.
PSE: Ai ene, zenbat denbora,
azken aldian ez zara sarri
ateratzen patiora!

III
PP: Franciscorekin ibili izan naiz
modistotik modistora…
PSE: Estibaliz gaur ere ez da azaldu
egongelako leihora…

IV
PP: Ez al duzu ikusi mudantzen
kamioia behera eta gora?
Entzun dudanez joan behar du
bizitzera Laudiora.

V
PSE: Baina geranioen potoak
ahaztu ditu erlaitzean…
PP: Ziur orbelik ere ez duela
utziko etxez aldatzean.

VI
PSE: Egia esan, hosto idorrak
moztu beharko lituzke.
PP: Nireak balira, zurtoinetik
kimatu nahiko nituzke.

VII
PSE: Zure pentsamenduen artean
erramu asko daukazu…
PP: Hiru koloreko bioleta
“pentsamendu” deitzen duzu?

VIII
PSE: Batzuek asun, besteek osin,
erramu edo ereinotz,
gauza beraren bi berba dira
tulipa eta idi-bihotz.

IX
PP: Zure erlaitza beti izan da
oso gustu onekoa,
kolore ugarikoa, baina
pentsamendu gabekoa.

X
PSE: Landareak mintzagai izanik,
ezetz asmatu esaten
zure senarrak eta aloe
verak zer antza daukaten?

XI
PSE: Zenbat eta gehiago ikertu,
zenbat eta gertuago,
aurkitzen zaio orduan eta
propietate gehiago.

XII
PP: Tira, zuek ere ez zaudete
diruaren eskasian;
txanpon-lore gehiegi dauzkazu
ezkerreko lorontzian.

XIII
PSE: Zergatik ez dituzu zeuk ere
hazitxo batzuk landatzen?
Abilezia sumatzen dizut
barrabas-belarra sartzen.

XIV
PP: Zure arrosak ere aspaldi
zimeldu ziren erabat.
PSE: Gehienak bai, baina guztiak ez,
bada biziraundako bat.

XV
PSE: Arrosa haren haziak, nire
potoan landatu arren,
hazi orduko zure potora
alde egin zuen pozarren!

XVI
PP: Nik aldaketa onartu nuen,
ustez, loreen onerako,
baina arantza gehiegi ziren
poto bakar baterako!

XVII
PP: Hemengo hau arantzatsua da,
baina hazten dabil ongi…
PSE: Zehazki ez al da pestizidarik
gabe hazitako hori?

XVIII
PP: Beno, Paloma… PSE: Bai, Pilar, agur…
Ostendu ziren etxean,
elkarri lorerik bota gabe
lore-aipu bakoitzean.

XIX
Auzokideak ibiltzen dira
beti elkarri mokoka,
baina berehala batzen dira
hirugarren baten kontra.