Pintzekin jarriak

Xabier Paya
Iñigo Azkona
I

Etxekoandre bik, goizean goiz,
patio heze batean,
arropa zintzilikatzen zuten
berba egin bitartean:
 
II

*PSE: Egunon, zer moduz, Estibaliz?
*EAJ: Kaixo, Paloma, egunon…
PSE: Lixibarako aro ederra…
EAJ: Ez dakit eutsiko dion…
 
III

PSE: Gaur ohi baino lehenago azaldu
zara salako leihora…
EAJ: Maria Teresa gabe aspertzen
naizelako izango da.
 
IV

PSE: Irratian eta telebistan
inkestak dira albiste,
dirudienez sozialistek
aukera handiak dituzte...
 
V

EAJ: Inkestek zuen alaba bien
bikiniak dirudite:
zerbait ikusten utzi, bai, baina
onena gordetzen dute.
 
VI

PSE: Zure ustez, hortaz, Ibarretxe
izango da lehendakari?
EAJ: Haren kulota beste guztiei
gelditzen zaie hain handi!
 
VII

PSE: Baina bizikleta maldan behera
doakio aspaldian…
EAJ: Guztia erraz egin duela
esan nahi duzu agian?
 
VIII

PSE: Ez ba! Juanjoren beherakadari,
nahiz alde izan ETB,
ez dio eutsiko ezta zuen
amaren sostenak ere!
 
IX

EAJ: Inaxik izan arren hamaika
sosten eta sosten-ondo,
zuen senarrak baino txaketa
gehiago ez du izango.
 
X

PSE: Miguel Fernando biajantea da,
bihar han eta gaur hemen…
EAJ: Klaro, eta klima ez da bera
Gasteizen eta Madrilen…
 
XI

PSE: Begira, amerikana hauxe,
Nafarroan erosia…
EAJ: Ez al du mahuka zabala eta
lepoa itxi-itxia?
 
XII

PSE: Beste hau, berriz, katalana da,
begizta eta xingola…
EAJ: Baina seguru denen artean
kaikua falta zaiola…
 
XIII

PSE: Ez ba, iaz santa eskerako
merke bat erosi nion…
EAJ: Egia da, jantzi bezain laster
hazkura ematen zion…
 
XIV

PSE: Zure senarrak, ordea, ez du
sufrituko hazkurarik,
hogeita hamar urte daramatza
beti abanderaturik!
 
XV

EAJ: Probatu gabe boxerrak, tangak
edota galtz “sentziloak”
gure Josebak nahiago ditu
betiko galtzontziloak.
 
XVI

PSE: Ohiturak mantentzea ona da,
baina beti ez da berdin,
gauza denak ez dira konpontzen
leungarri pixkatekin.
 
XVII

EAJ: Beno ba, gero arte, Paloma,
batu arte iluntzean.
PSE: Sokan jarritakoak haizeak
urrun eraman ezean.
 
XVIII

Eta oraindik zintzilik dago
sokan arropa guztia
patio honetara ez baita
sarri sartzen eguzkia.
 
XIX

Gauza bakarra argitu zuten,
(nahiz gaur argi den liderra)
sokari eusteko bi behar dira:
eskuma eta ezkerra.
 
*EAJ (Estibaliz Aurrekoetxea Jauregi)
*PSE (Paloma Sarriegi Espi)
 
Doinua: Axuri beltza ona duk baina.

Kanal honetatik interesatuko zaizu: Argiako Bertso jarriak
2023-01-10 | Imanol Lazkano
Bertso berriak, txapelketako finalari jarriak

Abenduaren 18an, Euskal Herriko Bertsolari Txapelketako finaletik bueltan jarritako bertsoak.


Xanti Zabalari omenaldia martxoaren 16an
Bertso idatziei ahotsa emateko garaia

2019-03-03 | Miren Osa Galdona
Zeruko Argia eta ARGIAko bertso jarriak
Xanti Zabala "Lexo"ren emaria

2014-01-19 | Imanol Lazkano
Basarriren mendeurrenean
Doinua: Ari naizela

 

Bertsolaritza zeraman bere
bihotz eta bekokian
berrikuntza bat behar zuela
ere berak bazekian.
Ostatuetan jaio zen hura
txertatuaz antzokian
urrats berririk eman ez balitz
norabide... [+]

Eguneraketa berriak daude