Bertsoaren lizentziei jarriak

  • I

    Euskalki eta azpieuskalki
    arteko diferentziak
    edo ondoko erdaretatik
    jasotako herentziak...
    Guk bota eta noiznahi beretzat
    hartuak konpetentziak...
    Soberan diren silabak edo
    hitz artean irentsiak...
    baina ez dira hoiek aipatu
    nahi ditudan lizentziak.
Aitor Sarriegi @asarriegi
2008ko otsailaren 10a
Aitor Sarriegi
Aitor SarriegiMaddi Soroa
II

Bertsolaritza sartu orduko
kulturaren merkatuan
maila benetan gora igo da
kontuan eta kantuan.
Eskubideak zirenak ustez
gurutzaturik patuan
sinadura bat bota genuen
SGAEren kontratuan,
espero gabe murgildu ginen
Ramoncinekin tratuan.



III

Deitutakoan oso gustura
joanagatik plazara
eskubidea ulertu dugu
Sony Recordsen erara.
Behin kantatu ta behin kobratzeko
izaten dugu parada
bizi osoan kobratzen beraz,
zergatik hasiko gara?
Gure ahotik irten orduko
bertsoa herriarena da.

IV

Lasai gaitezen, gure garunak
egindako ahaleginak
ez ditu eta baliatuko
datorren lehen ziztrinak.
Ezezagutzak sortu ohi ditu
sarri ulertu ezinak
Creative Commons, edo Copyleft
neurri-neurrira eginak
hortarakoxe daude aukeran
lizentzia ezberdinak.



V

Baina lepora bota aurretik
ezer edozein izeni
aitor dezadan, beste guztiak
bezala hasi nintzen ni.
Bertsolariok ez gara U2,
Lanku ez da noski, EMI
beraz zergatik dena geuretzat
gordetzen hainbeste premi?
Bertsoa gurpil hortan sartu da
baina ez zaio komeni.



VI

Niri berdin zait jaialdia den,
afaria, txapelketa...
argitaratze-lizentziari
jarri nahi diot arreta.
Esna gaitezen bertsolariok
aspaldi gabiltza eta
Copyright-aren mundu zoroan
zerbait kobratuz tarteka
ezker besoa altxatuz baina
eskuin hankatik herrenka.


Doinua: “Lurraren pean sar nindaiteke”.
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Argiako Bertso jarriak

Argiako Bertso jarriak kanaletik interesatuko zaizu...
ASTEKARIA
Azkenak
EGILEA
Eguneraketa berriak daude