Eusko Ikaskuntzak antolatuta, Zuberoako dantzen inguruko jardunaldia egingo da azaroaren 11n Barkoxen. Mixel Etxekopar, Patrick Queheille eta Jean Mixel Bedaxagar Zuberoako dantzen ezaugarriez arituko dira solasean eta Thierry Truffaut ikertzaileak Berdintasunak Zuberoako maskaraden eta Pirineetako eta Europako ihauteriekin hitzaldia eskainiko du. Gainera, Jean Michel Guilcher ikertzaile frantziarrak 1962 eta 1975 artean Zuberoan grabatu zituen filmak erakutsiko dituzte. Berak idatzi zuen, besteak beste, La tradition de danse en Béarn eta Pays basque français liburua.

Wintercase Musika Independentearen Jaialdi Ibiltariak Bilbo, Bartzelona, Valentzia eta Madril bisitatuko ditu aurten, azaroaren 1etik 26ra bitartean. Bilboko kontzertuak Santana 27 aretoan izango dira. Azaroaren 4an Ed Harcourt eta The Veils taldeek joko dute bertan, 16an Maxïmo Park eta The Spinto Band-ek, 18an Violent Femmes eta Arab Strap-ek eta 23an Surfin’ Bichos eta Brakes-ek. Informazio gehiago jaialdiaren web gunean: www.wintercase.com

Gasteizko zortzi erakusketa aretotan mundu osoko 162 argazkilariren irudiak jarri dituzte ikusgai, Periscopio, prentsa-argazkilaritzari begirada izenburupean. Orotara 800 argazki daude ikusgai Montehermoson, Ignacio Aldekoa Kultur Etxean, Goiuri jauregian, Kordoi Etxean, Vital Kutxa Fundazioan, Espacio Ciudad aretoan eta Amarican. Erakusketa nagusia Montehermoson paratu duten World Press Photo izenekoa da. Iaz prentsan agerturiko argazki onenak (177 guztira) bildu dituzte bertan. Interneten: www.periscopiovitoria.com.

Asteburu honetan ospatuko da Barakaldon eta Muskizen Herrien Arteko X. Folklore Jaialdia. Larunbatean Barakaldoko Ibarrakaldu, Huescako Nuestra Señora de la Alegría eta Asturiaseko Xagardua dantza taldeek emanaldia eskainiko dute Barakaldo Antzokian. Igandean, eguerdi partean, Huesca eta Asturiasko dantzariekin batera Muskizko Intzarra taldekoak arituko dira Meatzari Antzokian. Arratsaldean, Aspaldiko Txistularien, Sestaoko Zugarramurdi taldeko txalapartarien, Elai Alai taldeko dultzaineroen eta Ibarrakalduko musikarien kontzertua entzuteko aukera izango dute Barakaldo Antzokira bertaratzen direnek.

Otsailera bitartean makina bat ekitaldi izango da Donostiako hainbat aretotan, udazkeneko eta neguko kultur egitarauaren baitan. Antzerkia izango da protagonista nagusia. Orotara hogei obra inguru eskainiko dituzte, hiru estreinaldi tartean: 4 bromas y un funeral (Teatro Estudio konpainiarena), Pasos en el techo (Multiescena) eta Lapurren kobazuloa (Txalo). Bi dantza emanaldik, hamaika kontzertuk eta zarzuela batek osatzen dute egitaraua.

Nontzeberri web guneak (www.nontzeberri.com) eta Bilboko Zinema Fantastikoaren Jaialdiak (FANT) Nontzeflash IV. Animazio Lehiaketa eta Nontzefilm III. Film Laburren Lehiaketa jarri dituzte martxan. Lehiaketak on-line izango dira eta lan onenak FANT 2007 jaialdian proiektatuko dituzte. Bertan ezagutaraziko dituzte, era berean, lehiaketa bakoitzeko lau saridunak. Lanak aurkezteko epeak 2007ko otsailaren 28an (Nontzeflash) eta 21ean (Nontzefilm) amaituko dira. Lan guztiak web gunean bertan ikusi ahal izango dira.

Gasteizko Sancho el Sabio Fundazioak dokumentu berri mordoa bildu du bere web gunean (www.fsancho-sabio.es). Uneotan, 25.000 erreferentzia eta 160.000 argazki dituzten sei artxibo familiar, 230.000 erregistro bibliografiko dituen liburutegia eta datu-baseko 1,6 irudi digital kontsulta daitezke Internetez. Sancho el Sabio fundazioa mundu osoko dokumentazio zentro garrantzitsuenetako bat da eta pasa den hilean 60.000 lagunek bisitatu zuten bere web gunea, horietatik %15ek Espainiako estatutik kanpo.