Araba lurralde historikoan EAJ-EA koalizioa izan da bost hautagaitza nagusien artean eserlekurik irabazi duen bakarra, aurreko legealdian baino bi eserleku gehiago. Galtzaile bakarra bat izan da ere: EH elkargoa. Hots, esparru abertzalean eserlekuen aldaketa izan da. Lizarra-Garaziko Akordioaren alderdiak eta alderdi konstituzionalisten artean izan diren boto aldaketari behako bat ematea komeni da.
EAJ-EArena izan da eskualde honetan boto gehien irabazi duen hautagaitza: 16.878 boto. PSE-EEk, berriz, 1998an baino 10.654 boto gehiago lortu du, PPk 2.576 eta IU-EBk 1.655; EHk 8.874 boto galdu dituelarik. Hala izanda ere, 1998an alderdi konstituzionalistek Lizarrakoek baino 10.631 boto gehiago zituzten lurralde honetan, eta aldi honetan, 14.002. Aldea, beraz, handitu dute. Duela bi urte baino 3.371 boto gehiago dute konstituzionalistek. Konstituzionalisten arteko lehiarik izan ez bada ere, bien arteko sasilehian, Araban PSE-EE irabazle jalgi da PPrekiko. Abertzaleen artean, berriz, EHren porrota erabatekoa izan da abertzaletasun moderatuaren mesedetan.

EAJ-EA koalizioa izan da eserleku gehien emendatu duena Bizkaian: bi. PP, berriz, bat gehiago atera duen alderdi bakarra. PSE-EE aitzitik, ustekabeko latza hartu du bere eremutzat jotzen duen lurralde honetan; aurreko legealdian baino eserleku bat gutxiago beteko du Gasteizko Legebiltzarrean. Konstituzionalisten arteko lehian, PP atera da indartua eskualde honetan, eserleku bat gehiago eta 39.689 boto gehiago bildu dituelako. PSE-EEk, artean, 12.676 gehiago erdietsi dituelarik. Edonola ere, EH izan da lurralde honetan ere galtzaile nagusia, EAJ-EAren mesedetan betiere. 48.672 boto galdu ditu EHk. IU-EBk bere eserlekua atxiki du 1.815 boto gehiagorekin. Bizkaian, Lizarrako Akordioaren aldekoek 143.821 boto gehiago lortu zituzten 1998an, eta oraingo honetan 142.821 botoko aldea mantentzen dute konstituzionalistekiko. Hala ere, datu esanguratsu bat azpimarratu beharra dago: konstituzionalistek Lizarrakoek baino 14.367 boto gehiago lortu dituzte azkeneko bozketaldi honetan. Konstituzionalistek 53.365 boto erdietsi dituzten bitartean, Lizarrako Akordioaren sina-tzaileek 29.998 gehiago erdiesti dituztelarik.

Abertzaletasunaren eremuan EAJ-EAk erabateko garaipena lortu du. Beste bi lurraldeetan bezala bi eserleku gehiago erdietsi ditu eta 56.056 boto gehiago. EH izan da eraba-teko galtzailea, bere-berezko eremuan izan ere. Zazpi eserleku lortu zituen Lizarra-Garaziko Akordioaren abarora eta hiru baino ez ditu eskuratu orain. 33.771 boto galdu ditu. Lizarrako sinatzaileen artean IU-EB atera da indartua aldi honetan. Eserlekurik gabe izatetik bat izatera pasa da. Antton Karrera militante historikoak beteko du Legebiltzarreko aulkia, duela bi urte baino 4.814 boto gehiago lortuz. Lizarrako sinatzaileek -EHren beherakada kontuan izanda ere- orduan baino 27.297 boto gehiago erdietsi dituzte. Konstituzionalistek berriz -PP eta PSE-EE alderdiek, alegia-, 21.709 boto gehiago lortu dituzte. Gipuzkoan, Lizarra-Garaziko Akordioaren sinatzaileek konstituzionalistek baino 134.299 boto gehiago zeuzkaten orain arte, eta une honetan 139.887 boto gehiago. Beraz, bi joeren arteko aldea 5.688 botoetan emendatu da Lizarrako Adierazpenaren aldekoen mesedetan.

EAJ-EA koalizioa izan da, dudarik gabe, eserlekuetan nahiz botoetan irabazle erabatekoa. 1998an baino sei legebiltzarkide gehiago izateaz gainera, 100.789 boto gehiago erdietsi ditu. EHk 81.217 boto galdu ditu EAEn, zituen hamalau biltzarkideetatik erdia baino ez du izango legealdi berrian. IU-EBk 7.384 boto gehiago lortuz batera, legebiltzarkide bat eraman du berekin. Hots, Lizarra-Garaziko alderdi sinatzaileek eserleku berberak dituzte orain eta 1998an. Hartara eta ondorioz, gauza beretsua gertatzen da konstituzionalisten artean. Legebiltzarkide kopuru berbera lortu dute, beraien kasuan, PPren mesedean izan bada ere. PPk hemezortzi legebil-tzarkide izan ordez hemeretzi izango ditu, PSE-EEk bat gutxiago kontatzen du orain: hamalau zituen eta hamairurekin gelditu da.
Eserlekuei gagozkielarik, deus gutxi aldatu da Lizarra-Garaziko Akordioaren aroan bizi izan zen egoerarekin alderatuz gero. Boto kopuruei behako bat ematea interesgarria da, alabaina. Lizarrazaleek duela bi urte baino 66.956 boto gehiago erdietsi dituzte: 754.022 lortu zituzten orduan eta 820.978 orain. Konstituzionalistek, berriz, 487.533 eskuratu zituzten eta 574.837 erdietsi dituzte orain. Orduan baino 87.304 boto gehiago. Zentzu honetan, kontuan hartzeko beste boto kopuru konparagarria dugu begibistan. Duela bi urteko hauteskundeetan, Juan Jose Ibarretxe lehendakaria izatera eraman zuen bozketaldian Lizarrazaleek Konstituzionalistek baino 266.477 boto gehiago eskuratu zituzten: 754.022 versus 487.545.
Lehendakari berbera izanen duen legealdi honetako boto kopurua, berriz, honela gelditu da: Lizarrazaleek EAEko 820.978 herritarren sostengua dute eta konstituzionalistek 574.837 herritarrena. Bi joeren arteko aldea 246.141 botoena da. Hots, bi hauteskundeetako botoen arteko aldea murriztu da konstituzionalisten mesedetan. 1998koekin alderatuz gero, 20.336 botoetan gutxitu da Lizarrazaleen eta konstituzionalisten aldea. Honek guztiak, gogoeta hau egitera gonbidatzen gaitu. Lizarrazaleen eta konstituzionalisteen arteko indar harremanak berean mantentzen dira EAEko 2001eko hauteskundeen ostean. Konstituzionalistentzat nahiz Lizarrako subiranozale muturrekoentzako jipoi eta irakaspen zinez ederra.