Euri jasa galanta ari zuen joan den ostiraleko eguerdi aldera. Ehundik gora dezente lagunek Lasarteko Txitxardin Beltxa jatetxean izan zuten aterpea. Han banatu zituen Komunikazio Biziagoak hamabigarren aldiz Argia Sariak 2001. Sari banaketa baino lehen ordea, hezea eta hotz kirria gainetik kendu behar ziren. Horretarako lehendabizi bazkaritarako berotzeko mokadu bat edo beste eta txanpain goxoa. Mahaietara ehundik gora lagun bildu zirenean Pello Zubiria, ARGIA aldizkariko zuzendariak ongietorria eta ondo bazkaltzeko gonbitea luzatu zien guztiei.
Txokolatezko tarta eta laranjazko izozkia platerean genituela Joxe Mari Irazusta Komunikazio Biziagoa-ko lehendakariak 2000. urtean komunikabideak egindako urratsak gogoratu nahi izan zituen. Ez zituen ahaztu, nolanahi ere, AEKren auziperatzeak, Nafarroako Gobernuak hartutako erabakiak eta Zabaltzen banatzaileak jasandako miaketa.
Ondoren Antton Mendizabalek egindako sari sinbolikoak banatzeko ordua heldu zen.
Irratiko saria Iruñeko Euskalerria irratiko "Metropoli forala" saioak jaso zuen. Prentsa idatzian "Hernaniko Kronika"ri eman zitzaion eta saria jasotzera egunkariko hiru kazetariak hurbildu ziren: Jexux Mari Irazu, Unai Agirre eta Aritz Zerain. Telebista atalean berriz, "Bihar ere argituko dik, Felix" saioa izan zen sariduna eta Asier Arangurenek eta Andoni Egañak jaso zuten saria. Internet sailean irratiak sarean sartzeko asmoz ahalegina egin duten hiru gazte saritu ziren, irratia.com proiektuarekin. Publizitateko saria berriz Bizkaiko Foru Aldundiak abian jarritako "Bizkaia, turismo argia" kanpainak eraman zuen.
Merezimenduzko saria Nafarroarantz joan zen. "Sarea" proiektua garatu dute hiru irrati nafarrek. Saria, beraz, Beleixe, Esan Erran eta Aralar irratiek jaso zuten. Zazpigarren saria eta azkena eman zena izan zen hunkigarriena. Lutxi Zaldua ordiziarrak jaso zuen sari berezia. Gerra Zibila aurretik "Zeruko Argia"ra harpidetu eta orain ARGIA aldizkaria jasotzen duen emakume honi eman zitzaion saria. Nola ez, ordiziarra aspalditik harpidedun zaituztegun irakurle finen ordezkaria izan zen.