Euskal produktu multimediatikoak aurkeztu, hizkuntza ezberdinetan eginiko lanak ikusi eta proposamen berriak ezagutzeko helburuarekin antolatu du Gaia elkarte pribatuak Donostian urriaren 8 eta 9an burutuko den Multimedia eta Hizkuntza Gutxituen kongresua. Bertan, eremu urriko hizkuntzetan eginiko produktuak ezagutzeko aukera ederra izango dute Europatik etorriko diren adituek. Gaia elkarteko Nazioarte Saileko zuzendaria den Jokin Garateak azaldurikoaren arabera, produktu onak egiten dira euskaraz. Hala ere, euskaraz eginiko produktuek erosle potentzial mugatua omen dute eta ondorioz, zaila da beste hizkuntzekin lehiatzea. Garatearen esanetan euskaldunon artean, gutxi gorabehera 500.000 pertsonez osaturiko merkatua dago, katalanen artean 10.000.000 ingurukoa dagoenean esaterako.
Hala ere, Euskal Herrian oso produktu interesgarriak egiten direla azpimarratu du Garateak, eta adibide moduan unibertsitate mailan lan egiten duen Ixa taldearen lana edota Euser eta Elhuyar taldeek eskaintzen dituzten produktuak nabarmendu ditu.
Donostian ospatuko den biltzarrera Danka Sutabe, Ava Multimedia, Integral de Medios eta Ihardun Multimedia moduko enpresak etorriko dira. Era berean, zeltera eta sardiniera erabiltzen dituzten etxeak ere bertan izango dira. Izan ere, Gaiako kidearen ustez, "egungo komunikabide globalak kultur aberastasuna mantentzeko baliagarriak izan daitezke". Halaber, komunikabideek funtzio hau bete dezaten erabiltzaileentzat praktikoak izango diren tresnak garatu behar direla uste du. Alor honetan, Euskal Herrian egiten diren produktuak euskaldunok ezagutzen ez ditugunez, produktu horiek plazaratzea euren lana dela adierazi du Gaia elkarteko kideak.
Produktu multimediatikoak kaleratzeko Europar Batasunak eta Eusko Jaurlaritzak diru laguntzak eskaintzen dituzte. Hala ere, Europatik euskaraz eginiko produktuak finantzatzeko aukera bakarra taldeka eskatzea da, Jokin Garatek jakinarazi duenez. Bere hitzetan, "gure hizkuntza minoritarioa izatean esku pribatuei ez baitie laguntzarik ematen".
Multimedia eta Hizkuntza Gutxituen Nazioarteko Topaketek ere helburu bera dute, hain zuzen ere, hizkuntza gutxituetan eginiko teknologien zabalkunderako eztabaida leku bat sortzea. Egitasmo hau esku artean dutela, egitarau zabala prestatu dute azaroaren bigarren asterako Gaia elkarteko kideek. Kongresuaren ingurukoak www.gaia.es/multilinguae helbidean kontsulta daitezke.

Azaroaren 8an goizeko 9:00etan irekiko dituzte ateak eta kongresura gerturatuko direnei beharrezko dokumentazioa emango diete. Jarraian, harrera eta aurkezpenak egin ostean, Europako gutxiengoen hizkuntzen egungo egoera aztertuko dute. 10:30etatik aurrera, berriz, Interneten hizkuntza ezberdinak erabili ahal izateko, itzulpen automatikoak duen garrantziaz mintzatuko dira. Era berean, hizkuntza gutxituen ikasketarako irakurketa eta idazkera aplikazioak erakutsiko dira, eta merkataritza elektronikoan euskararen sustapenak duen garrantziaz ere arituko dira Miarritzeko Philips Consulting etxeko kideak. Arratsaldeko 15:30etan, Linguistic Institute of Irelandeko (ITE) partaideek arriskuan dauden hizkuntzen babes gisa Interneten erabilerak duen garrantzia azpimarratuko dute. Asteazkeneko jardunaldiak Donostiako Ixa taldeko partaideek amaituko dituzte, hizkuntzaren tratamendu automatikoan egungo lanek eta ikerketa lerroek betetzen duten funtzioa azalduz.
Osteguneko jardunaldiei hasiera emateko berriz, menonita hizkuntzak bizirik jarrai dezan Alemaniako eta Errusiako estatuetan bizi diren menonitek sarean eginiko lanak aurkeztuko dituzte. Jarraian, 10:00etan, gutxiengoen hizkuntzen babesean Europako Batzordeak duen betebeharraz hausnartzeko ordu erdi izango da. Hizkuntzen plangintzan aurrera eraman beharreko herri politikaz eta izan beharreko gastuez ere hitz egingo da 12:00etatik aurrera. 13:00ean Eusko Ikaskuntzako kideek euskararen sustapenerako Euskal Herriak behar dituen erakundeez solastatuko dira. Ordu erdi beranduago, berriz, Sidneyko Unibertsitateko Konputagailu Zientifikoen departamentuko ordezkariek erreferentziako hizkuntza baliabide integratuen birsorkuntza modu ezberdinetan argitaratuta nola izango litzatekeen azalduko dute. 15:30etan Eslovenian kokatua dagoen Ljubljana Unibertsitateko kideek hizkuntza gutxituek globalekiko nolako jarrera izan behar duten azalduko dute. Azaroaren 8 eta 9an burutuko diren jardunaldi hauek mahainguru baten ostean amaituko dira Eusko Jaurlaritzako ordezkariek egingo duten agerraldiarekin.
Azken finean, bi egun hauek euskarazko produktu multimediatikoak merkaturatzeko balio dezakete. Jokin Garateak azaldu duen moduan ,"merkaturatzeko kontzientzia eduki behar da, bertoko eta bertorako enpresak egiteko"