Kuadrillategi proiektua Lasarte-Orian 1997ko irailetik 2000ko ekainera burutzen ari den ekintza-ikerketa proiektua da, eta 14-20 urte bitarteko gazte koadrilak euskaraz bizitzeko helburua du. Ttakun Euskara Elkartearen, Muntteri AEK Euskaltegiaren eta Udaleko Euskara Zerbitzuaren ekimen komunez jarri zen abian. Lau dinamizatzaile-ikerlariren esku egon da proiektuaren ardura teknikoa eta beraiek dira orain ikerketaren emaitzak ateratzen ari direnak.
Proiektua zortzi koadrila euskaldunekin eta sei koadrila mistoekin abiatu zen, haiekin hitzarmena egin ostean. Ikerketaren gidari-ikerlariek azaldu digutenez, "koadrila euskalduna kide guztiak euskaldunak dituen eta euskaraz egiteko ohitura duen koadrila da. Bestalde, koadrila mistoa euskaldunak, erdal elebidunak eta erdaldunak proportzio ezberdinetan dituen eta erdaraz egiteko ohitura duen koadrila da".
Proiektuaren helburua euskararen erabilera kalean, herrian eta giro informaletan bultzatzea da. "Pentsatzen dugu euskalgintzak asko aurreratu duela alderdi formaletan, irakaskuntzan eta horrelako kasuetan. Baina, gero, jendeak modu informalean hitz egiten duenean, normalean erdarara jotzeko ohitura du".
Hori da lehenengo kontua, baina bada beste bigarren bat ere, eta Kuadrillategiri berezitasuna ematen diona, hain zuzen ere: koadrilekin egiten dutela lan gazteek hizkuntz ohiturak alda ditzaten. Kuadrillategiren uste nagusia da, hizkuntz jokaeran aldaketak eragiteko harreman sare osoaren gainean esku hartu behar dela. Horregatik aukeratu dira lagunarteak lan-unitate bezala.

Xede horiek bideratzeko, hiru baliabide erabili dituzte: eskolak, balantze saioak eta ekintzak.
"Eskolak euskaltegiko euskara klaseak dira" diote ikerlariek, "baina 'lagunarte bat, ikastalde bat' irizpideari eutsiz antolatu dira. Hau da, koadrilako kideak klase berean egon dira eta horrek hizkuntz gaitasun ezberdineko kideak aldi berean eta gune berean aritzea ahalbideratzen du". Metodologiari dagokionez, komunikazioan oinarritu dira, eta horrek eskola eta kalearen arteko aldea txikitzen du; batetik besterako pasabidea ahalik eta berezkoena, errazena eta emankorrena izan dadin lortzen da.
Lagunarte bereko euskaldunak eta erdal elebidunak batera euskaraz komunikatzen ari direnean zenbait inertzia sortzen direla aipatu digute ikerlariek. "Lehendabizi, erdal elebidunek berez hobetzen dute euren hizkuntz gaitasuna. Bigarrenik, euskaldunek hizkuntza modu estrategikoan erabiltzeko gaitasuna (laguntzeko funtzioa) garatzen dute. Eta hirugarrenik, batzuen eta besteen artean euskaraz egiteko ohitura finkatzen da".
Bigarren baliabidea balantze saioak izan direla aipatu dugu. Batez beste hilabetean behin burutu dituzte lagunarte mistoekin, eta epe luzeagotan, berriz, lagunarte euskaldunekin. Lagunarte mistoei dagokienez, kideen artean euskaraz komunikatzeko praktikari buruzko ebaluazio saioak izan dituzte. Esate baterako, aurrerapenaz ohartu, zailtasunak azaldu, irtenbideak bilatu eta talde motibazioari neurria hartu. "Hizkuntza berriaz hitz egitea, ohiko bihurtu arte, egoera arrotza eta behartu samarra da" ikerlariek diotenez, "eta kideen harremanetan balizko gatazka-iturburua izan daiteke. Balantze saioen bidez, balizko gatazkak onbideratu nahi izan ditugu, bai eta lagunarteei bere-berea den prozesuaren gaineko kontrola eman ere".
Lagunarte euskaldunei dagokienez, balantze saioek bestelako mintzagaia izan dute, beren laguntzaile funtzioari lotutakoa hain zuzen ere: lagunarte mistoekiko harremanaren intentsitatea, erdal elebidunekiko hizkuntz jokaera eta laguntza funtzioa hobetzeko iniziatibak.
Balantze saioetan proiektuaren ezaugarri handienetako bat agertzen da, hau da, bi alderen arteko hitzarmena edo negoziazioa izatea. Lagunartea dugu alde bat eta proiektua (dinamizatzailearen bidez ordezkatua) bestea. Proiektuaren hasieran bi alderen arteko hitzarmena sinatu ondoren, hitzartutakoaren bilakaerari buruzko ebaluazioa egiteko funtzioa betetzen dute balantze saioek.
Hirugarren baliabide materiala ekintzak dira. Kulturgairen bat edo motibo ludikoren baten aitzakiaz antolaturiko irteerak, tailerrak eta emanaldiak izan dira. Kuadrillategiren adierazpen osoa izan da, bertara bildu baitira proiektuan parte hartu izan duten lagunarte guztiak, euskaldunak bezala mistoak ere. "Koadrilen arteko gunearen erakargarritasun indarrari eustea izan dugu beste erronketako bat" diote, "eta ekintza egitasmoa biltzarretan negoziatuz lortu da interesgune komunak aurkitzea eta gunearen bizitasunari eustea".
Oro har, koadrila guztiek, mistoek bereziki, dinamizatzaile bana izan dute, eta horiek lau funtzio bete dituzte: eskoletan irakasle, balantze saioetan psikologo, ekintzetan begirale eta proiektuaren ikerketa izaerari erreparatuta, ikerlari.
Oraindik ondorioak atera gabe badituzte ere, ateratako emaitzekin txosten bat egiteko asmoa dute. Horrek bi zati izango ditu: batetik, esperientzia honek izan duen emaitza datuetan, eta bestetik, aurrera begira ongi zehaztutako proposamena beste herri batzuetan horrelako proiektu bat abian jartzeko