Urtemugak hausnarketarako parada izaten dira. Atzera begira jarri, egindako bideari begiratu eta, oraina ulertuta, geroa pentsatzeko. 2025 honetan, urtemuga biribila bete dugu: Gipuzkoa izenaren idatzizko lehen aipamenetik mila urte bete dira, eta aukera ezin hobea iruditu zaigu Erdi Aroko gizarteaz dakiguna eta ez dakiguna berrikusteko. Garai hartan, izan ere, hartu baitzuten forma egungo lurraldearen eta identitatearen elementu nagusiek.