Zubietako erraustegiaren funtzionamenduan "irregulartasunak" egiaztatzeko zenbait galdera egin ditu asteazkenean Europako Parlamentuan Ezker Batuko Sira Rego eurodiputatuak. Euskopolek emandako txostenaren ondorio kezkagarrien aurrean, erraustegiari buruzko ikerketa irekitzeko aukera planteatu du, haren funtzionamendu irregularra egiaztatzeko.

Ezker Anitza-IUk prentsa oharrean azaldu duenez, Regok txosteneko ondorioak aipatu ditu. Sistemak erreakziorik izan gabe 26 orduz Emisioen Muga balioak jarraian gainditu zirela zehazten du Euskopolen txostenak. Era berean, azterlanak agerian utzi du erraustegia Arkaitzerrekako ur kutsatzaileen isurketen erantzulea dela. 

Hala, Ezker Anitzako eurodiputatuak Europako Batzordeari eskatu dio begira dezala Zubietako erraustegiak 75/2010 zuzentaraua eta hondakinei buruzko Europako araudia betetzen dituen ala ez. Halaber, galdetu du ea Gipuzkoako Hondakinen Partzuergoarekin harremanetan jarriko den instalazioaren egoera ezagutzeko.

Gipuzkoako Ezker Anitzak salatu du "gardentasun ezak" eta "kudeaketa akatsek" kezka sortu dutela herritarren artean. Arantza Gonzalez koordinatzailearen arabera, "onartezina" da Gipuzkoako Foru Aldundiak, enpresa kudeatzaileari kontratua bete dezala ez eskatzea, instalazioa abian jarri zenetik izan dituen gorabehera ugarien aurrean.