ARGIA.eus

2020ko uztailaren 08a
Analisia

Xinaurri lanaren uzta

  • Bigarren itzuli honetan ere urtetako lanaren emaitza lortu dute abertzale ezkertiarrek: Ziburun, Urruñan eta Itsasun auzapez izango dira. Bozketen lehen itzulian Biriatun eta Donapaleun irabazirik, Uztaritzen eta Baigorrin 2014ko garaipen historikoa berriz ere errepikaturik, luzatuz doa abertzale eta ezkertiarrek kudeatu herri ertain-handien zerrenda.

Jenofa Berhokoirigoin @Jenofa_B
2020ko ekainaren 29a
Eneko Aldana Ziburuko auzapez berria, bere aitarekin. (Bob Edme)

1960. hamarkadan sorturiko mugimendu abertzaleak bide handia egin du denbora laburrean: aurkariek baztertu eta gogorki trataturiko Enbata zikina izatetik, politika jokalekuko eragile nagusi izatera heldu dira. Lehenik herri ttipietan, baserri munduan eta geroz eta gehiago hirietan ere. Agintaldiz agintaldi, oposiziotik eta lurretik egin xinaurri lanaren emaitza dute ziburutar, urruñar zein itsasuarrek, duda gabe. Poz handiz garaipena ospaturik, kanpainan plazaratu alternatibaren mezua gauzatzeko lanari lotu beharko dira gaurdanik, hots, xinaurri lanarekin segitu beharko dute. Tartean, nola ez, etxebizitzaren arazoari begira jarriz –batez ere bigarren etxebizitzen gaia Urruñan eta Ziburun eta hirigintzak dakarren laborantza lurren desagerpena Itsasun–, udalen politika norabidez aldatzeko betebeharra dute. Beste zerrenda bati juntaturik, gehiengoan kokatzea lortu dute Hendaian eta Senperen. Eta oposizioan badira ere, emaitza hobeak lortu dituzte Maulen, Miarritzen eta Azkainen.

Ekainaren 28ko bozketen beste elementu inportantea izan da Baionakoa, orain arteko auzapez Jean-Rene Etxegaraik lortu garaipen argia. Botoen %46,19 eskuratuz, bigarren atera da Henri Etxeto ezkertiarra. Honek duen jarrera antieuskaldun eta jakobinoak eragin du, hein handi batean, BBE Baiona Berde eta Elkarkidea bigarren itzulian harekin elkartu ez izana eta abertzale ezkertiar guttik harentzat bozkatu izana. Azken aldietan “zerrenda abertzaleak” baino “kide abertzaleak dituzten zerrenda irekiak” osatu dituzte eta elkarlan horren fruitua da auzapez abertzaleen zerrendaren luzatzea. Baina Baionak argi utzi du guztiak ezkerrekoak izanda ere elkarlana eta errespetua bi aldeetarik behar direla, aliantzak posible bilakarazteko. Lehen itzulian botoen %13,12 egin zuen BBEk bigarren itzulian bakarrik ez aurkeztea erabakirik, hautetsi abertzale eta ezkertiarrik ez da egonen ondoko sei urteetan Lapurdiko hiriburuan. Aipatzekoa da Zuberoako hiriburua ezkerrera berriz itzuli dela. Botoen %38,24 bildurik, auzapezaren aulkia galdu du Mixel Etxebestek eta Louis Labadot komunista jakobinoak izanen du ardura %40,34 lorturik –Beñat Elkegarai abertzale ezkertiarrak bozen %21,41 eskuratu du, 2014ko emaitza hobetuta, herriko kontseiluan aulki batetarik bitara pasaz eta beraz, xinaurri lanean segitzeko indar gehiago bilduz–. Azken elementu bat emaitzak analizatzeko: Maulen izan ezik, abstentzioa handia izan da hauteskunde hauetan ere.

Herriko etxeen osaketak argiturik, orain Euskal Hirigune Elkargokoarena dator. Uztailaren 17an aukeratuko dute lehendakaria.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Herri bozak 2020  |  Ziburu  |  Urru˝a  |  EH Bai  |  Itsasu

Herri bozak 2020 kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude