“Azken egunetan gai mediatikoa bihurtu baldin bada ere, instituzioak ez dira gai pertsona hauen oinarrizko beharrak asetzeko. Badirudi Donosti Cup-en 5.000 gazte jasotzen indar guztiak xahutu zituztela. Honen aurrean herritarrok antolatu eta erantzun duin bat ematearen beharra ikusi dugu”, adierazi dute sare sozialetan zabaldutako oharrean.

Hiriko pertsona anonimoak elkartu dira errefuxiatuei laguntzeko eta instituzioei presio egiteko. Talde hau Antigua auzoko Txantxarreka gaztetxearekin harremanean jarri eta gazteak laguntzeko prest azaldu dira.

Sare sozialen bitartez zabaldu dutenez Txantxarreka Gaztetxea errefuxiatuentzako “gune segurua” bihurtzea erabaki dute eta bilera irekira deitu dute ostiralean 17:30ean, abuztuak 10.

Jendeari gaztetxera gerturatzeko eskatu diote janaria, medikamentuak, elkartasuna eta maitasuna eskaintzeko, besteak beste. Antigua auzoaren elkartasuna espero dute: “Guzti hau ez da aurrera aterako laguntza sareko eta Txantxarrekako kideekin bakarrik. Denon laguntza beharrezkoa da! GOAZEN ANTIGUO HARRERA-AUZO BIHURTZERA!”